Aos comicios concorre o actual dirixente, Senén Barro, e o candidato independiente Juan Casares
SANTIAGO DE COMPOSTELA, 3 Abr. (EUROPA PRESS) -
As eleccións a reitor da Universidade de Santiago (USC) celebranse o vindeiro 10 de maio con dúas candidaturas, cuxo prazo de presentación remata hoxe. Así, aos comicios concorrirán o catedrático de Ciencias da Computación e Intelixencia Artificial e actual reitor, Senén Barro; e o catedrático de Enxeñaría Química, Juan Casares Long, como independente.
A Universidade de Santiago celebrará o vindeiro 10 de maio, ademas das eleccións a reitor da institución, ao Claustro, Xuntas de Centro e Consellos de Departamento.
Neste proceso electoral poderán votar un total de 35.394 persoas, das que 28.382 pertencen ao Campus de Santiago e 7.012 ao de Lugo. O sector que máis electores agrupa é o de estudantes de 1º e 2º Ciclo, 22.163 en Santiago e 6.030 en Lugo.
Pola súa banda, no sector do profesorado exercerán o seu dereito ao voto 1.746 docentes en Santiago e 474 en Lugo; no do PAS votarán 1.008 en Santiago e 144 en Lugo; no sector de estudantes de 3º Ciclo e posgrao están chamados ás urnas 2.636 electores en Santiago e 314 en Lugo; por último, os investigadores en formación que votarán son 829 en Santiago e 50 en Lugo.
CALENDARIO
A proclamación provisional de candidatos terá lugar o día 6 de abril e, logo dun prazo para presentar recursos contra esta, a listaxe definitiva farase pública o vindeiro día 24. Ao día seguinte dará comezo a campaña electoral que se prolongará ata o día 8 de maio. As persoas interesadas en exercer o voto anticipado deberán facelo os días 4, 5 e 8 de maio, mentres que a xornada de votación será o 10 de maio entre as 10.30 e as 18.30 horas.
Nas eleccións de reitor e representantes no Claustro as circunscricións electorais para o profesorado funcionario doutor e o estudantado de 1º e 2º Ciclo serán as facultades e escolas, mentres que para o PDI funcionario non doutor e contratado serán as cinco grandes áreas de coñecemento. Xa para os investigadores en formación, o estudantado de 3º Ciclo e posgrao e o PAS, estas circunscricións serán os campus de Lugo e Santiago.
Por outra banda, nas eleccións a representantes de Xuntas de Facultade e Escola as circunscricións electorais serán os centros, nas dos Consello de Departamento os propios departamentos e nas dos Consellos Científicos dos Institutos os correspondentes centros de investigación.
A USC componse de 19 centros no Campus de Santiago e outros seis no Campus de Lugo. Por áreas de coñecemento, en Ciencias da Saúde a USC dispón de 18 departamentos, en Ciencias Experimentais 19, outros 22 na de Ciencias Sociais e Xurídicas, 3 en Ensinanzas Técnicas e 14 departamentos en Humanidades.
PROCEDEMENTOS
O reitor da USC será elixido mediante sufraxio universal libre e secreto, e neste proceso o voto ponderarase polos sectores da comunidade universitaria previstos para o claustro, de xeito que se lle atribuirá a cada un deles a mesma porcentaxe de representación que teñen neste órgano de goberno.
Así, o profesorado funcionario doutor conta co 51% da porcentaxe deste voto ponderado, correspondéndolle aos estudantes de 1º e 2º Ciclo o 24%, a outro Persoal Docente e Investigador o 14%, ao PAS o 8% e aos investigadores en formación e estudantes de 3º Ciclo e posgrao o 3%.
O Claustro da USC, máximo órgano representativo da comunidade universitaria, estará composto polo reitor, o secretario xeral, o xerente e 300 representantes dos diversos sectores da comunidade universitaria elixidos mediante sufraxio universal que se distribúen en 153 membros do profesorado funcionario doutor, 42 das restantes categorías de PDI, 72 estudantes de 1º e 2º Ciclo, 9 investigadores en formación e estudantes de 3º Ciclo e posgrao e 24 PAS.
Andalucía
