UVIÉU, 23 Feb. (EUROPA PRESS) -
El secretariu xeneral de la FSA-PSOE, Adrián Barbón, nun quixo esti xueves entrar nel fondu de los polémiques que puedan surdir nel so partíu y indicó que la so prioridá y la de la Executiva actual de la FSA ye "construir l'alternativa socialista a les polítiques de dereches".
Barbón pronuncióse nestos términos, a entrugues de la prensa en Llaviana, depués de la polémica xenerada dempués de que se diera a conocer la existencia d'un grupu de whatsapp de militantes del PSOE de Mieres (conceyu de nacencia de Fernández) que falaben la posibilidá de nun dir a la entrega d'un premiu al presidente asturianu y exsecretariu xeneral de la FSA-PSOE, Javier Fernández.
La situación motivó que Fernández yá dixera hai unos díes que nun va dir a Mieres, que l'exsecretariu d'Organización y diputáu, Jesús Gutiérrez, dixera qu'espera qu'el 'PSOE nuevu' saque los mesmos resultaos electorales que'l 'vieyu' y que la secretaria d'Organización nueva, Gimena Llamedo, tuviera qu'intervenir con unes declaraciones nes que reclamó unidá y mostró la so refuga a xenerar tensión.
A les palabres de Llamedo remitióse Barbón, que nun quixo entrar nel fondu del asuntu, a pesar de les continues entrugues de los periodistes sobre un posible enfrentamientu dientro del partíu.
El secretariu xeneral de la FSA-PSOE indicó que'l so partíu ye güei la única esperanza pa cientos de miles d'asturianos, incluíos los que salieron esti xueves a les cais pa reclamar pensiones dignes.
"Nós tamos reconectándonos cola ciudadanía", indicó Barbón, qu'esplicó que nota que la xente vuelve mirar a la FSA-PSOE y confiar nellos. Dixo que la so organización tien que "trescender" los problemes orgánicos y esmolecese, sobremanera, de los problemes de los asturianos.
N'opinión del dirixente socialista, la prueba de que tán faciendo les coses bien ye la "obsesión" de la presidenta del PP d'Asturies, Mercedes Fernández, cola so persona, al culpalos de que nun haya presupuestos. Barbón defendió'l so criteriu de nun aceptar un pactu col PP porque incluía una "propuesta envelenada", la de "baxar ingresos y amenorgar prestaciones sociales".
