LUGO, 24 Nov. (EUROPA PRESS) -
O alcalde de Becerreá, Manuel Martínez, asignado dende este martes ao grupo de non adscritos na Deputación de Lugo, secundou unha iniciativa do PP para reforzar as competencias do pleno provincial fronte á xunta de goberno que levaba aparellada unha petición de modificación das condicións de traballo dos deputados que non forman parte de ningunha das forzas representadas na institución.
A sesión plenaria comezou cunha intervención de Martínez, quen, expulsado de forma preventiva do PSOE, manifestou o seu "estupor" tras ver nos medios de comunicación que se lle considera "un tránsfuga". "Se son tránsfuga non hai problema ningún e vouno asumir; pero dende a educación do pleno, entre deputados, que retírese esa palabra e especifíquese o que son: un deputado non adscrito", reclamou.
Anticipándose ao punto no que se debatería a súa expulsión do grupo do PSOE, pediu "rigor e coherencia" ao presidente da Deputación de Lugo, o socialista Darío Campos, ao que tamén demandou que lle aclarase a súa situación. "E que esas declaracións non se volvan repetir", esixiu, ao que Campos lle espetou que ata o punto 15 -no que se decidiu a súa saída - seguía sendo "deputado do Grupo Socialista".
A continuación, no debate da petición do PP de reforzar as competencias do pleno -onde o bipartito de PSOE e BNG non ten maioría- en detrimento da xunta de goberno, Martínez logrou introducir unha emenda para modificar as condicións de traballo dos deputados non adscritos. "Que non tránsfugas, como din algúns sen rigor", puntualizou.
Neste sentido, o rexedor de Becerreá argumentou que el traballa "dende as dez da mañá ata as catro da tarde todos os días" para pedir que se lle "faciliten medios e recursos" para desenvolver o seu labor. Así, requiriu "un local para dar roldas de prensa" e preveu contra as "serias dificultades" con que se pode atopar "para acceder á documentación".
"A REALIDADE SUPERA A FICCIÓN"
É por iso que a voceira do PP na Deputación de Lugo, Elena Candia, aceptou a súa emenda, non sen preguntar se "os voceiros do BNG e do PSOE seguen dicindo que aquí non pasa nada, que todo segue igual" e que conforman "un goberno unido". "A realidade sempre vai superar a ficción", advertiu.
Ante isto, o representante do PSOE no pleno provincial, Álvaro Santos, afeou a Candia que leve ao pleno "unha moción de Manolo Martínez" en lugar de iniciativas "polo interese dos cidadáns da provincia". Ademais, Xosé Ferreiro (BNG) apelou a que toda modificación do regulamento da deputación se faga "dende o consenso".
"O mellor que podía facer, se pensa no ben da provincia, é que sentásemos os tres grupos políticos máis o deputado non adscrito a falar dun novo regulamento", defendeu o nacionalista ante Candia, non sen recordarlle que se pretendía ese cambio o podía impulsar durante os seus catro meses á fronte da institución. "O goberno ten 12 deputados, igual que tiña vostede cando gobernaba", sentenciou.
AUSENCIA DO PLENO
Tras o debate deste asunto, aprobado cos 12 votos do PP máis a papeleta de Martínez, Darío Campos viuse obrigado a exercer o seu voto de calidade para que unha moción do BNG que pedía derrogar a suba do canon de Sogama saíse adiante.
Na medida en que o de Becerreá xa anunciara que non apoiaría as iniciativas dos nacionalistas por vetar a súa presenza na xunta de goberno, decidiu ausentarse do salón de plenos durante a votación.
No exterior, reafirmouse en que "nunca" vai apoiar unha iniciativa do Bloque. "Como dixo algunha deputada do PSOE, isto é bidireccional, e se eles non me queren a min, eu non os quero a eles", resolveu Martínez; quen, non obstante, apoiou que a suba do canon é "desmesurada" e "presuntamente irregular".
"Quixese agradecerlles (aos nacionalistas) que presentasen esta moción, pero nestes momentos non os necesitamos. Necesitabámolos ao principio, cando concellos como Allariz, simbólicos nesta loita, nos abandonaron, e o único que queda é A Pobra do Brollón [dos gobernados polo BNG]. O concello de Becerreá do que son alcalde non necesita que o Bloque o defenda", resolveu.
