VIGO, 14 Ago. (EUROPA PRESS) -
A Xunta de Galicia constatou que, no rexistro electrónico oficial de plans de autoprotección da Dirección Xeral de Emerxencias, "non hai constancia da inscrición do plan de seguridade correspondente á organización do Marisquiño, a pesar de ser un dos requisitos legais para obter a licenza por parte do Concello de Vigo".
Así o trasladaron este martes fontes da Administración autonómica, que subliñaron que é competencia municipal "comprobar a viabilidade" de dito plan de seguridade (que a empresa si presentou no Concello e Porto) e realizar as inspeccións e controis correspondentes.
"A competencia de autorizar ou denegar, de darse o caso, a celebración dos espectáculos no termo municipal de Vigo corresponde ao goberno municipal, en cumprimento da recentemente aprobada Lei de Espectáculos Públicos de Galicia", indicou a Xunta.
Segundo trasladou o Goberno galego, é o Concello o que outorga a licenza de actividade e, en consecuencia, o que "debe explicar a razón pola que autorizou o concerto e demostrar que comprobou que o lugar era seguro e respectaba o aforamento".
Por outra banda, a administración tamén apuntou que o goberno local vigués "non solicitou en ningún momento a colaboración da Xunta en materia de seguridade nin emerxencia, a pesar de ser habitual solicitar para os grandes eventos a presenza do camión do Grupo de Apoio Loxístico da Axencia Galega de Emerxencias".
