Pleno.- O PPdeG rexeita unha iniciativa para pedir a transferencia da parte do FROB en NCG Banco á Xunta

SANTIAGO DE COMPOSTELA, 24 Abr. (EUROPA PRESS) -

O PPdeG rexeitou este martes unha iniciativa do BNG na que pedía a transferencia á Xunta da participación que o Fondo de Reestruturación ordenada Bancaria (FROB) ten en Novagalicia, así como que se dea unha solución inmediata á "fraude das participacións" e que se reintegren plenamente as indemnizacións de exdirectivos de Novacaixagalicia, dous puntos estes últimos que si avalou o PSdeG.

O voceiro dos populares no Parlamento de Galicia, Pedro Puy, xustificou a súa negativa a pedir o traspaso das accións do FROB por que é unha posibilidade que "nin está na lei nin é posible" e rexeitou que se inste ao Goberno a dar solución aos afectados por preferentes e a lograr a devolución das indemnizacións ao considerar que non compete á Xunta.

Ademais, a proposición non de lei incluía un cuarto punto, rexeitado tanto por populares como por socialistas, no que o BNG pedía confeccionar un plan de conversión de NCG Banco nunha entidade pública de crédito.

Durante o debate, unhas declaracións do autor da iniciativa, o nacionalista Carlos Aymerich, que dixo, ao fío das reformas en sanidade, que "o populismo do PP é do xenófobo", provocaron as protestas do grupo do PPdeG. Aymerich citou declaracións do voceiro do PP no Congreso, Alfonso Alonso, quen indicou que o sistema sanitario "non pode ser un coladero de inmigrantes", e as do conselleiro de Sanidade de Castilla-La Mancha, José Ignacio Echániz, que afirmou que "moita xente colleu unha patera porque sabía que en España tiña a asistencia sanitaria garantida".

"Isto é xenofobia e racismo do peor, de extrema dereita,", acusou Aymerich, quen chegou a dicir que estas declaracións son "fascistas", aínda que logo retirou este último termo, á vista das queixas dos deputados do PPdeG.

De volta ao asunto da proposición non de lei, Aymerich preguntouse que impide reclamar un "traspaso" como conseguiu outras competencias e aplicalo ao banco galego. O decreto de saneamento publicado en febreiro deste ano, expuxo, "aboca á entidade a ser subhastada por un euro", polo que considerou que o proceso, dende a fusión das antigas caixas foi "un fracaso político sen paliativos".

Así, fronte ás posibilidades formuladas por Novagalicia de sacar a concurso unha parte da participación ou subhastar a entidade, defendeu que a Xunta se faga cargo da parte do FROB, que é "máis barato". De feito, cifrou o custo en 2.430 millóns, a inxección do FROB II no banco.

CREDIBILIDADE

Pola súa banda, a voceiro do PSdeG no debate, María José Caride, considerou que a petición dun EPA --esquema de protección de activos-- por parte dos investidores para entrar en Novagalicia responde ao temor a "posibles perdas adicionais".

Sobre as preferentes defendeu que é a cuestión que "está a minar máis a credibilidade" de Novagalicia. Ademais, defendeu que para dar unha imaxe razoable aos investidores é necesario que "se devolvan as indemnizacións excesivas dos exdirectivos".

"NIVEL ALTO DE DEMAGOXIA"

En nome do PPdeG, Puy censurou que o BNG pretenda que o FROB "regale a súa participación á Xunta" e que se propoña reintegrar o diñeiro das preferentes pero non se diga "con qué fondos". "O BNG está nun nivel alto de demagoxia e populismo e PSOE na metade, porque apoia a metade dos puntos,", dixo.

En concreto, sobre as preferentes apuntou que Novagalicia formulou varias solucións, "unha delas moi boa" para os afectados, pero foi "torpedeada na Comisión de Competencia da UE". "Nin os actuais xestores --do banco-- nin a Xunta crearon o problema", resolveu.