Denuncian "discriminación laboral" do Sergas cara a unha embarazada

Foto: EUROPA PRESS

VIGO, 20 Ago. (EUROPA PRESS) -

   Representantes dos sindicatos CC.OO., UGT, CIG, CSIF e SAE, ademais de membros da Plataforma Galega polo Dereito ao Aborto, e outros cargos políticos, concentráronse este mércores ás portas de acceso do servizo de Urxencias do Hospital Xeral de Vigo para denunciar a "discriminación laboral" do Sergas cara a unha traballadora embarazada.

   Segundo sinalaron os voceiros sindicais, esta traballadora asinou un contrato pero non chegou a desempeñar ningún labor, porque a unidade de saúde laboral determinou que "non era apta" e "a mandou para a súa casa".

   A ese respecto, os sindicatos recordaron que non hai precedentes dun caso así na área de Vigo e que "se asinaron contratos a mulleres en avanzado estado de xestación e non pasou nada". "Estar embarazada non é estar enferma, e o que o Sergas debería facer é o que se fixo sempre nestes casos: adecuar o posto ás circunstancias desa traballadora", recalcaron.

   "Non houbo ningunha sensibilidade, non se respectaron as normas e hoxe foi unha traballadora embarazada, pero mañá podería ser outro con calquera problema de saúde", advertiron, ao tempo de que insistiron en que os sindicatos "non "van consentir" ningún retroceso nos dereitos adquiridos polas mulleres traballadoras.

   Pola súa banda, a Plataforma Galega polo Dereito ao Aborto foi máis alá nas súas acusacións, e vinculou o acontecido a esta traballadora coas políticas "regresivas" do PP e un intento por "devolver as mulleres aos seus roles tradicionais". "Trátase de protexer estas traballadoras e non de mandalas para casa", reclamou