Expertos do ámbito da xustiza formulan a necesidade de adaptar ao século XXI a lexislación e dotarse de xulgados para macroprocesos
SANTIAGO DE COMPOSTELA, 28 Nov. (EUROPA PRESS) -
O Tribunal Supremo (TS) prevé pronunciarse no primeiro trimestre de 2015 sobre o recurso de casación que tanto a Xunta como a Fiscalía presentaron contra a sentenza emitida pola Audiencia Provincial da Coruña tras o xuízo pola catástrofe ambiental do 'Prestige'.
Así o indicou este venres o maxistrado do TS e exfiscal xeral do Estado, Cándido Conde-Pumpido, quen evitou "anticipar ningún criterio" ao respecto dado que o asunto está "neste momento" sometido á sala da que el forma parte.
Non obstante, sobre os prazos que manexa o TS, apuntou que "neste momento" cre que o tema "está pendente dalgún trámite cunha comisión rogatoria", polo que calcula que "posiblemente no primeiro trimestre do ano próximo se poderá resolver".
Conde-Pumpido, que foi fiscal xeral do Estado durante a maior parte do procedemento, defendeu este venres ante os medios procurar deixar "sempre os profesionais que traballasen" con total liberdade dende o punto de vista técnico".
Ademais, en declaracións aos xornalistas antes de impartir a conferencia 'Responsabilidade penal e civil subsidiaria por delito contra o medio. Perspectiva xurisprudencial', explicou que o "problema" que ten o Estado español ao seu xuízo é que conta cunha lexislación procesual decimonónica.
"Témonos que enfrontar a feitos do século XXI cunha lei de axuizamento criminal do século XIX. É coma se fixésemos circular ao AVE por unhas vías de hai dous séculos", ilustrou o maxistrado.
De aí que opinara que existe a día de hoxe "un modelo que debe levar aos responsables políticos a ser conscientes da necesidade de cambialo".
Así mesmo, persoalmente avogou por que en cada comunidade autónoma exista un xulgado especial de grandes procedementos, de carácter complexo. Porque cuestiones de tal magnitude como foi no seu día a do 'Prestige' "non poden recaer sobre un xulgado como o de Corcubión", con titulares que van cambiando e sen a experiencia e o coñecemento requiridos.
FISCAL DE MEDIO
Previamente, na xornada 'A experiencia do Prestige, dirixida por María Loureiro e Belén Trigo, o fiscal de Medio Ambiente, Patrimonio e Urbanismo de Galicia, Álvaro García-Ortiz, repasou ante o auditorio as principais dificultades que se presentaron durante o xuízo.
Baixo o nome 'O Prestige, xestión de catástrofes e macroxuízos', García-Ortiz tamén aludiu ao feito de que un caso deste tamaño recaia sobre un xulgado como o de Corcubión, e expuxo a súa visión dun procedemento no que, dende a súa perspectiva, non se deu o enfrontamento dun Estado "contra un pobre capitán", por Apostolos Mangouras, o capitán do petroleiro. Ao contrario, na súa opinión, foi "un pobre Estado ribeirán" o que se enfrontou "ao mundo do mar e do comercio marítimo con falta de garantías".
Tras unha causa cuns 300.000 prexudicados nominais, e uns danos "difusos" estimados pola propia Loureiro --cun estudio "vangardista" neste ámbito-- en máis de 4.000 millóns de euros, a súa impresión é que existe "toda unha armazón montada para que esas empresas non sexan solventes", o que "dificultou moito" o traballo.
A iso sumáronse impedimentos polas implicacións internacionais do accidente e a presión social e mediática, aínda que outros elementos como o desenvolvemento das novas tecnoloxías permitiron que ao final se puidese desenvolver o que segundo a súa valoración foi "un bo xuízo".
Con todo, o fiscal de Medio recoñeceu que "evidentemente" está "insatisfeito" coa sentenza, de aí que se recorrese, baseándose en tres liñas argumentales que resumiu.
En primeiro lugar, a súa tese baséase en que da desobediencia "pode nacer unha responsabilidade civil"; en segundo termo, en que ve "imposible" desligar a devandita desobediencia dun delito ambiental, ao xerar un risco; e como terceiro entende que a sentenza recolle elementos abondos como para que o feito de que o buque partise fose "polo menos unha imprudencia".
Por último, Álvaro García-Ortiz resaltou que, pola súa banda, el non recibiu "ningunha presión" política durante o proceso, aínda que si apuntou ao "secretismo" que o "condicionou", posto que "á administración lle custou bastante mostrar todo" sobre o accidente. "O fantasma do Prestige é un fantasma que dá moito medo", chamou a atención.
CARLOS VARELA
Anteriormente, durante a inauguración, que presidiu o reitor da USC, Juan Viaño, e na que tamén participou o director do Idega Xoaquín Fernández Leiceaga, interveu o fiscal xeral de Galicia, Carlos Varela, quen centrou o seu discurso en dúas reclamacións, a primeira, a necesidade de dotarse de instrumentos para procedementos de repercusión masiva, que permitan a España colocarse "no século XXI".
A segunda demanda de Varela é a relativa a configurar un "arsenal de medidas xurídicas" para lograr a "tutela integral" en materia de medio, indo máis alá da responsabilidade penal, ata a civil.
JUAN JOSÉ MARTÍN ÁLVAREZ
O director xeral de Xutiza da Xunta, Juan José Martín Álvarez, recordou os labores do Goberno "para facer posible" un xuízo cuns 230.000 folios, 350 tomos e 25 caixas de documentación.
Por último, tamén este alto cargo se referiu ao recurso de casación interposto, así como ao custo "engadido" que supuxeron as periciais, das que en principio fai cargo a Administración. Cando o TS dite sentenza, a catástrofe do 'Prestige' "volverá estar de actualidade", augurou.
