ADAE y Educación aborden la situación de la especialidá docente de llingua asturiana y gallego-asturiana

   UVIÉU, 22 Ene. (EUROPA PRESS) -

   Esti miércoles tuvo llugar una xunta ente representantes de l'Asociación de Docentes de Asturianu y Eonaviego (ADAE) y la Conseyera d'Educación del Principáu d'Asturies, cola mira d'abordar la situación de la especialidá docente de llingua asturiana y gallego-asturiana.

   Durante l'alcuentru, según informó ADAE, la Conseyera treslladó'l so compromisu de siguir trabayando nesti asuntu y anunció la so intención de solicitar una xunta cola nueva ministra d'Educación, Milagros Tolón, pa tratar de manera específica esta cuestión.

   "L'oxetivu de dicha xunta va ser encamentar al Ministeriu a modificar los reales decretos necesarios que permitan la creación de les especialidaes docentes de llingua asturiana y gallego-asturiana, una reivindicación histórica del colectivu", espliquen.

   Dende ADAE manifiesten la necesidá d'un trabayu conxuntu y coordináu ente sindicatos, Conseyería y profesoráu, "una idea que foi compartida pola mesma Conseyera", dicen, quien coincidió na importancia de sumar esfuerzos p'avanzar na solución d'esti conflictu.

   L'Asociación de Docentes de Asturianu y Eonaviegu espera que'l Gobiernu del Principáu d'Asturies tome en serio esta problemática y actúe "cola determinación necesaria pa poner fin a un conflictu llaboral que caltien en situación d'interinidá a más de 300 docentes".

   "Dende ADAE recordamos que, faciendo'l mesmu trabayu y cuntando cola mesma formación, el profesoráu tien de tener los mesmos derechos llaborales. Coles mesmes, alvertimos de que, mientres nun se produzan meyores reales y compromisos firmes, el colectivu va siguir coles movilizaciones hasta llograr una solución xusta y definitiva a un conflictu llaboral que lleva enquistáu décades", concluyen.