Albert Rivera diz que Punset nun espresó los sos desacuerdos cola Executiva antes de dimitir

MADRID, 18 d'Ochobre (EUROPA PRESS)

El presidente de Ciudadanos, Albert Rivera, afirmó que la eurodiputada de la formación naranxa Carolina Punset nun espresara públicamente los sos desaucerdos col Comité Executivu de C's antes d'anunciar esti llunes la so dimisión como miembru d'esti órganu de dirección.

"Nun hubiera, a lo menos públicamente y en les nueses xuntes, nenguna estratexa distinta, entrín y non votábamos xuntos y votábamos lo mesmo", declaró a los periodistes nos pasiellos del Congresu cuando-y preguntaron polos motivos argumentaos por Punset.

En tou casu, el líder de C's dixo respetar esa "decisión personal" de l'antigua vocera del partíu naranxa nes Cortes Valencianes. "Yo respeto fondamente y amás agradezo'l trabayu que fizo Carolina na mio Executiva, nel mio equipu", señaló.

NUN SE SENTÍA IDENTIFICADA CON DECISIONES DE LA DIRECCIÓN

La eurodiputada, que magar salir de la Executiva sigue nel partíu y caltién el so escañu, dio a conocer la so decisión al traviés d'un comunicáu publicáu poco dempués asistir a la xunta del órganu de dirección celebrada esti llunes en Madrid.

Dicía nun sentise "identificada" con "la mayor parte de les decisiones estratéxiques tomaes pola dirección del partíu" y añadía que tampoco consiguía "axuntar apoyos abondo como pa determinar nengún cambiu de postura", anque nun precisaba a qué se refería concretamente.

La segunda razón que mentaba ye'l so deséu de "caltener la coherencia colos principios fundacionales de Ciudadanos", un partíu identificáu cola tradición ilustrada, los valores laicos, sociales y progresistes, que tenía "como propósitu irrenunciable la desarticulación de cualquier tipu de nacionalismu, incluyendo'l rexonalismu non independentista".

Na Comunidá Valenciana, al so xuiciu, C's "nun supo favorecer unes estructures orgániques aparentes pal fomentu d'estos valores". Punset terminaba'l comunicáu señalando la necesidá d'una fuerza política "reformista, tresversal" y que combata "el sectarismu d'izquierdes y dereches y el nacionalismu", y espresando'l so convencimientu de que tanto los sos compañeros de partíu como Albert Rivera "van siguir lluchadno día a día pa consiguir que Ciudadanos ocupe esi papel".

Darréu, el partíu indicó que la salida de Punset de la Executiva ta rellacionada coles sos opiniones al respective de "los símbolos constitucionales y les llingües cooficiales", cuestiones al respective de les que "n'ocasiones" defendió na Comunidá Valenciana "postures que topetaron col sentir mayoritariu de los afiliaos de Ciudadanos".