Asturies afonda na so política llingüística: l'ALLA y el Gobiernu marquen compromisos pa los dos años vinientes

   UVIÉU, 24 Jun. (EUROPA PRESS) -

   La Academia de la Llingua Asturiana (ALLA) aconceyose esti llunes cola Presidencia del Principáu d'Asturies pa tratar la política llingüística que va desendolcase n'Asturies nos dos años vinientes de la llexislatura y enantes de les eleiciones autonómiques de 2027.

   La xunta celebróse na casa de la Presidencia del Principáu, a la que acudieron el presidentedel Principáu, Adrián Barbón, la conseyera de Cultura, Política Llingüística y Deporte, Vanessa Gutiérrez, y el vicepresidente de l'Academia, David Guardado.

   Na reunión l'ALLA plantegó varies iniciatives, que van dende la presentación urxente y puesta en práutica d'una estratexa sistemática pa dignificar l'asturianu y l'eonaviegu na vida pública, social, académica y cultural d'Asturies.

   Tamién charraron sobre l'axilización del Mandatu-Marcu y del Contratu-Programa en rellación col usu del asturianu na RTPA. L'Academia reclamó la creación d'una Direición de Conteníos en Llingua Asturiana, plantegamientu que'l gobiernu comparte.

   Amás, tratose l'adaptación de la Llei d'Usu del Asturianu de 1998, calteniendo la base refrendada pol Tribunal Constitucional. La propuesta de la Academia prioriza'l so desarrollu reglamentariu pa facer la llei plenamente efeutiva, reservando les posibles modificaciones o axustes pa correición d'errores o cuestiones estrictamente téuniques, como la denominación oficial "asturianu" en vez de "bable/asturianu" o "eonaviegu" en vez de "gallego/asturianu".

   Falose tamién de la consideración prioritaria del asturianu n'otruos ámbitos como los planes institucionales de potenciación y desarrollu de la Intelixencia Artificial (IA). El gobiernu informó qu'esta cuestión apaez nel documentu de planificación de midíes de política llingüística apurríu y l'Academia ofreciose a compartir la so esperiencia na materia.

   N'últimu llugar, viéronse medíes pa meyorar la escolarización del asturianu y del eonaviegu, incluyendo el seguimientu d'asistencia voluntaria a les aules y l'elaboración de materiales curriculares axustaos a la LOMLOE y a los decretos del Principáu. El gobiernu valoró positivamente estes propuestes y transmitió'l so compromisu cola especialidá docente pal profesoráu.