Asturies nun va ampliar l'horariu de la hostelería porque "nun ye momentu de relaxaciones adicionales"

UVIÉU, 26 Feb. (EUROPA PRESS) -

El Gobiernu del Principáu d'Asturies nun va ampliar l'horariu de la hostelería porque según insistió'l vicepresidente del Gobiernu asturianu, Juan Cofiño, "nun tamos en momentu de facer relaxaciones adicionales nueves, yá veremos como evoluciona l'andanciu". "La receta d'Asturies sigue siendo la mesma ser precavíos y nun entainar na toma de decisiones", dixo.

En rueda de prensa posterior al Conseyu de Gobiernu y preguntáu poles propuestes de la patronal d'hostelería, OTEA, y l'alcalde d'Uviéu, Alfredo Canteli, que pidieron retrasar el zarru de la hostelería, Cofiño insistió en que "Asturies sigue en riesgu estremu y nun podemos rebaxar les midíes pa evitar les recaídes".

Asina dixo que se van dir tomando les decisiones según la evolución de la pandemia y siempre con criterios sanitarios y científicos.

Nesti sentíu y preguntáu pola Selmana Santa, Cofiño recordó que Barbón yá se pronunció y "nun hai más que dicir". "La Selmana Santa va existir nel calendariu, pero les celebraciones nun van poder ser. Nun podemos relaxanos, nun tamos en condiciones de relaxanos, vamos ser precavíos, porque'l virus sigue equí", repitió.

Esplicó que se van dir flexibilizando midíes "con tolos procuros" destacando qu'Asturies ta en riesgu estremu entá y d'equí a Selmana santa "van dir viendo que midíes, si ye que fuera'l casu, puen adoptase". "Repito, si ye que fuera'l casu", indicó Cofiño.