Asturies va cuntar con una planta d'ensamblaxe de robots que va dar serviciu a toa Europa y norte d'África

UVIÉU, 4 Oct. (EUROPA PRESS) -

La compañía española Alisys y Ghost Robotics xuniéronse pa impulsar la robótica de xeneración nueva n'Europa y el Norte d'África. Nel marcu d'esta operación, van crear una planta d'ensamblaxe de robots n'Asturies.

Alisys, empresa española especializada en soluciones de robótica de serviciu, acaba d'anunciar la so alianza estratéxica con Ghost Robotics, fabricante estaounidense líder en robótica cuadrúpeda, pa promover l'aplicación de soluciones basaes nesti tipu de plataformes n'Europa y el Norte d'África.

La compañía española cuenta establecer una planta d'ensamblaxe, soporte técnicu y caltenimientu n'Asturies, p'adaptar la producción de los robots del fabricante estaounidense al ámbitu européu.

Eduardo Gómez de Tostón, CEO de Alisys, destacó en nota de prensa qu'esti alcuerdu "fortalez la posición de lideralgu" de dambes compañíes y amás "va impulsar nel mercáu européu aplicaciones nueves con un potencial tresformador enorme".

Ye'l casu de l'automatización de xeres en terrenos difíciles y zones impredicibles, onde les capacidaes de los robots convencionales, con ruedes o cadenes, nun son abondo, según esplicó.

Nel marcu d'esta collaboración, Alisys va desempeñar un papel fundamental como sociu tecnolóxicu principal de Ghost Robotics pa Europa y Norte d'África, liderando la rede europea de distribución y esplegue de servicios nuevos n'escenarios hasta agora nun mui trataos.

Pal cofundador y director de Ghost Robotics, Gavin Kenneally, esta collaboración "representa un pegollu fundamental" dientro de la so estratexa global.