Un centenar d'empresarios asturianos firmen un manifiestu a favor de la oficialidá

UVIÉU 29 May. (EUROPA PRESS) -

Un total de 110 profesionales y empresarios que trabayen n'Asturies publicaron un manifiestu a favor de la oficialidá del asturianu y del gallego-asturianu onde destaquen qu'esti marcu llegal va suponer qu'Asturies sía "una comunidá con mayor autoestima y querencia polo propio, coles ventayes qu'ello va trayer pa la xeneración d'economía llocal y puesta en valir de la marca Asturies".

Asina, ente les negociaciones abiertes ente los grupos parllamenterios pa incluyir la oficialidá nel Estatutu d'Autonomía, el grupu de profesionales y empresarios indiquen que "ye clave superar esta falta de protección del patrimoniu llingüísticu d'Asturies y de los derechos de les persones que quieren facer usu de les llingües d'Asturies nel so día a día, como ciudadanos o como empreses".

"La situación actual fai inviable vivir nelles o desendolcar la nuestra actividá profesional con toles garantíes cuando lo queremos facer facturando, faciendo publicidá o etiquetando los nuestros productos", señalaron, p'afirmar que la falta d'oficialidá "xenera inseguridá xurídica y torgues alministratives de tou tipu".

Pa iguar esta situación, recuerden, nun hai otru marcu llegal que nun sía la oficialidá, como pasó en Galicia, polo que se pregunten por qué n'Asturies nun ye posible un pactu ente'l PSOE y el PP nesi sentíu. "Asturies tien munchos problemes de más difícil solución, pero esti namás requier un consensu alredor de la defensa de la nuestra cultura y una votación na Xunta Xeneral", indicaron.