El conseyeru asegura que ta mediando ente supermercaos y productores de Xata Asturiana

UVIÉU, 16 Jun. (EUROPA PRESS) -

El conseyeru de Desenvolvimientu Rural, Agroganadería y Pesca, Alejandro Calvo, manifestó esti martes nel Plenu de la Xunta que'l Gobiernu asturianu trabaya pa mediar y intentar rebaxar les tensiones ente ganaderos y supermercaos.

Calvo manifestábase asina en respuesta a una entruga de la diputada de Podemos, Nuria Rodríguez sobre si piensa'l Gobiernu tomar dalgún tipu de midida énte l'anunciu d'Alimerka de nun mercar carne a más d'una trentena de cebadorios con IXP Xata Asturiana.

Alejandro Calvo pidió nun adelantar decisiones que nun tán tomaes y argumentó que la información de la que dispón como conseyeru ye directa tanto de los mesmos ganaderos como de la empresa.

"Nun saquemos conclusiones mui ceo. Esti conseyeru fai'l so trabayu siempre intentando permediar. Sabemos qu'hai tensiones y tamos trabayando pa solucionales", dixo Calvo, qu'indicó que nes últimes selmanes caltuvo contactos permanentes p'analizar la situación.

Per otru llau, la diputada de Podemos aseguró que sabe perfectamente qu'hai 31 ganaderos de Xata Asturiana qu'a día de güei nun tienen nin idea de lo que va facer esa empresa.

"Agora ye momentu de ver ónde s'asitia caún, si defendiendo a los ganaderos o a les grandes cadenes. Ye'l momentu de dar un pasu más, nun ye permisible qu'esa marca traicione d'una manera más qu'evidente a esos ganaderos", dixo Nuria Rodríguez que fixo una defensa de les bondaes de la carne de Xata Asturiana.