Cultura completa la tramitación ambiental pa modernizar y ampliar la estación de Fuentes d'Iviernu

   UVIÉU, 7 Sep. (EUROPA PRESS) -

   La Conseyería de Cultura, Política Llingüística y Deporte completó la tramitación ambiental del proyectu d'aprovechamientu integral y sostenible de la estación d'esquí de Fuentes d'Iviernu en publicando nel Boletín Oficial del Principáu d'Asturies (BOPA) el cambéu de la so Declaración d'Impactu Ambiental (DIA).

   El documentu considera vidable l'actuación dende'l puntu de vista ambiental al cumplir coles midíes correctores pa protexer la redolada y la flora.

   El proyectu va dexar optimizar el dominiu esquiaderu de Fuentes d'Iviernu hasta algamar un máximu de 16 kilómetros de pistes abalizaes, frente a los 8,7 actuales. Tamién contempla la posible instalación de nuevos telesquíes pa desconxestionar les zones de debutantes, ameyorar la movilidá dientro de la estación y facilitar la futura conexón con San Isidro.

   La planificación inclúi, amás, la posibilidá de construyir una balsa y instalar sistemes de producción de nieve pa encarar temporaes con menores precipitaciones y enllargar les condiciones fayadices pa la práctica del esquí. Toes estes actuaciones tendrán de desenvolvese acordies con les condiciones establecíes na DIA.

   Amás, contémplase la posibilidá de construyir una cafetería con aseos na base entemedia, crear un hangar y talleres pal caltenimientu de maquinaria y remontes y ampliar l'edificiu d'usos múltiples p'ameyorar la escuela d'esquí, les oficines y el serviciu d'arriendu de material.