Cultura va invertir 750.000 euros en Valgrande-Payares p'atraer visitantes tol añu

   UVIÉU, 7 Jul. (EUROPA PRESS) -

   La conseyera de Cultura, Política Llingüística y Deporte, Vanessa Gutiérrez, anunció una inversión de 750.000 euros na Estación Iverniza y de Monte Valgrande-Payares pa favorecer la desestacionalización y atraer visitantes al equipamientu l.lenizu tol añu. Los primeros trabayos van empezar a finales d'esti exerciciu.

   "Valgrande-Payares, dende la so apertura fai yá más de setenta años, foi motor de desenvolvimientu pal territoriu, y pa esti gobiernu ye prioritaria la so adecuación pa que pueda ser esfrutada en periodu branizu cola práctica de too tipu d'actividaes al campu, amás de siguir siendo una estación referencial pa practicar deportes d'iviernu", esplicó la titular de Cultura n'una nota de prensa.

   Con esti oxetivu, ellaboróse un plan d'actuaciones qu'empezó con una inversión cercana a los diez millones na telecabina, inaugurada a finales de 2022, y que sigue agora coles primeres actuaciones de la segunda fase. Eses intervenciones van implicar un gastu de 750.000 euros p'ampliar la ufierta de la estación, modernizala y convertila nun exemplu de diversificación y desenvolvimientu sostenible.

   Esta inversión va dexar desenvolver un paquete de proyectos clave para modernizar la estación y diversificar la so ufierta más allá de la temporada de nieve, con meyores n'infraestructures, accesibilidá y programación d'actividaes par faer del equipamientu un destín curiosu en cualquier dómina del añu.

   Ente les principales actuaciones previstes inclúyense les siguientes: el diseñu d'un bikepark integráu na redolada natural. L'adecuación y meyora d'accesos pa facilitar la llegada de toles persones; la renaturalización de zones verdes y recuperación paisaxística; el refuerzu de la rede de senderos y pistes pa bicicleta de monte.

   Al pie de esto, contémplase la creación de rutes accesibles y nuevos miradores panorámicos y el diseñu y creación d'una pista d'esquí de fondu que va ampliar les posibilidaes deportives de la estación. Parte d'estes actuaciones van empezar yá esta seronda, respetando l'actividá braniza y la temporada de nieve. La execución va completase en 2026.