La editorial rioxana Ediciones del 4 de agosto publica dos poemarios n'asturianu

'Oración y siete estampas más', de Xuan Bello, y 'Destruimientu del xardín', de Sofía Castañón

UVIÉU, 14 Ago. (EUROPA PRESSS) -

Ediciones del 4 de agosto publica y presenta dientro del festival Agosto Clandestino, que se celebra cada branu en La Rioxa, dos cuadiernos escritos n'asturianu.

Trátase de 'Oración y siete estampas más', onde Xuan Bello compón un poema en trés partes n'asturianu, amás de siete estampes en castellanu.

Per otru llau, Sofía Castañón reedita'l poemariu 'Destruimientu del xardín' (Hesperya, 2012), que namás se publicó en dixital, agora n'edición billingüe cola traducción en castellanu d'Alba González Sanz.

Xuan Bello (Paniceiros, Tinéu, 1965) ye ún de los escritores más destacaos de la lliteratura española contemporanea. Autor en llingua asturiana, publicó los poemarios 'El llibru de les cenices' (1988), 'Los nomes de la tierra' (1990), 'El llibru vieyu' (1994), 'Los caminos secretos' (1997), 'El llibru nuevu' (2017) y 'Les isles inciertes' (2020). Ente la so obra como narrador destaquen 'Hestoria Universal de Paniceiros' (2002) y 'Los cuarteles de la memoria' (2003), axuntaos nel volume 'Paniceiros' (2004).

Sofía Castañón (Xixón, 1983) ye poeta y realizadora audiovisual. Trabayó en prensa escrita, televisión y radio y recibió dellos premios de poesía y por proyectos artísticos. Publicó en castellanu varios poemarios premiaos y n'asturianu 'Tiempu de render' (Premiu Nené Losada 2009) y 'Destrumientu del xardín' (2012).