UVIÉU, 11 Nov. (EUROPA PRESS) -
La conseyera d'Educación, Lydia Espina, refugó esti xueves impulsar otru programa pilotu como'l del 2017 y que permitía l'usu del asturianu como llingua vehicular voluntaria nuna segunda asignatura col castellanu.
Espina apelló al "rigor" y la "seguridá xurídica" na so respuesta al diputáu de Foru, Adrián Pumares, pa defender el modelu propuestu pol Executivu d'Adrián Barbón de "cooficialidá amable". "La única manera de garantizar la enseñanza n'asturianu ye cola cooficialidá amable y ensin imposiciones", dixo na comisión d'Educación celebrada esti xueves na Xunta Xeneral.
Pumares pidía a la conseyera recuperar el plan y propunxo estendelo "a más escueles y tamién a los institutos" pa que tol alumnáu matriculáu n'asturianu "pueda tener garantizáu'l derechu d'ampliar la so formación llingüística", faciendo tamién mención al Navia-Eo, onde considera que se debería tamién aplicar esti proyectu pa reforciar l'aprendizaxe del gallego-asturianu.
Espina incidió en que se trató d'un plan pilotu "esperimental" pa favorecer l'empléu voluntariu del asturianu "con usu llimitáu y acutáu a una materia" nunos pocos centros y garantizando que "la llingua vehicular y predominante yera'l castellanu".
"Xurídicamente nun se pue dir más allá al nun ser oficial l'asturianu", afirmó, añadiendo que "nun cuenta volver implantar un plan un pilotu".
Andalucía
