'Esti amor asturfalante' de Sofía Castañón gana'l Premiu Xuan María Acebal de poesía n'asturianu

   UVIÉU, 24 Sep. (EUROPA PRESS) -

   La Conseyería de Cultura, Política Llingüística y Deporte escoyó'l poemariu 'Esti amor asturfalante', de la escritora Sofía Castañón, como ganador de la XXXI edición del Premiu Xuan María Acebal de poesía n'asturianu, según informó esti miércoles el Principáu.

   El xuráu destacó "la madurez de la obra, la so capacidá de trescalar y remover emociones, un usu del asturianu especialmente cuidau y la solvencia na estructura d'un poemariu nel qu'una historia d'amor, una historia sobre'l llinguaxe y un contestu afectáu pel mundu entrelláciense nun testu con versos de llargu aliendu".

   El director xeneral d'Acción Cultural y Normalización Llingüística, Antón García, presidió l'equipu de persones espertes encargaes de valorar les obres, que tuvo integráu pola filóloga Iris Quintana y los poetes Taresa Lorences, Alba González Sanz, Rodrigo Olay y Miguel Rodríguez Monteavaro, esti últimu ganador de la edición pasada. Actuó como secretaria Laura Marcos, filóloga de la conseyería.

TRAYECTORIA DE SOFÍA CASTAÑON

   Sofía Castañón nació en Xixón en 1983. Ye escritora y realizadora audiovisual. Nel 2006 ganó'l premiu Asturies Nuevu de Poesía con Animales interiores y nel 2009 consiguió'l Nené Losada Ricu con Tiempu de render, un poemariu n'asturianu escritu nel tiempu que pasó na Residencia d'Estudiantes arriendes de consiguir la beca de creación del Conceyu de Madrid.

   De magar, escribió y publicó diversos poemarios y collabora con medios de comunicación asturianos, como La Nueva España, El Comerciu o La Voz d'Asturies, y d'ámbitu estatal, como El Huffington Post, eldiario.es, Diagonal o Climática.

   Nel terrenu audiovisual destaca'l so llargumetraxe documental 'Dizse poeta (2024)', sobre'l panorama poéticu contemporaneu dende la perspectiva de xéneru. Nel 2021 robló'l so segundu documental Que sirva d'exemplu.

   El premiu Xuan María Acebal que promueve la Conseyería de Cultura, Política Llingüística y Deporte ta dotáu con 6.000 euros y la publicación de la obra ganadora.