Fiscalía pide trés años de prisión pal presidente de Fapas por homicidiu imprudente

UVIÉU, 16 d'Ochobre (EUROPA PRESS)

La Fiscalía del Principáu d'Asturies solicitó la condena a tres años de prisión del presidente del Fondu pa la Protección de los Animales Salvaxes (Fapas), Roberto Hartasánchez, pola muerte d'un trabayador nun accidente llaboral en Teberga nel 2011. La vista oral va celebrase esti vienres, 17 d'ochobre, nel Xulgáu de lo Penal número dos d'Uviéu, a les 9.00 hores.

El Ministeriu Fiscal caltién que, sobre les doce de la mañana del 9 setiembre del 2011, el trabayador, de 26 años, peón forestal, con antigüedá de dos meses, alcontrábase preparando l'acondicionamientu d'una pista forestal que comunica Coañana con San Juan de Volantes, usando un dumper. Al altor del kilómetru 2 del términu municipal de Teberga, salió de la pista pel marxe izquierdu, sentíu ascendente, cayendo por un desnivel d'unos cuarenta metros, lo que-y causó lesiones de tal gravedá que determinaron la so muerte cuando yera treslladáu n'helicópteru al HUCA d'Uviéu.

Fapas, indica la Fiscalía, "nun tenía contratada la vixilancia de la salú" y el trabayador nun tenía la reconocencia médica fecha, estremu que permitiría determinar si tenía dalgún defectu que lu incapacitara pa la realización del trabayu. Amás nun tenía nenguna formación nin información en prevención de riesgos llaborales, nun teniendo, poro, la formación específica pal manexu seguru del equipu de trabayu que taba utilizando.

L'acusáu, presidente y representante llegal de la entidá Fapas, permitía l'usu del equipu de trabayu "con plena conocencia de que'l trabayador fináu nun tenía nengún tipu de formación ya información en materia de prevención de riesgos llaborales y que nun tenía la reconocencia médica fecha". Coles mesmes, permitía l'usu del dumper, tanto per parte del trabayador fináu como por dos de los sos compañeros, "sabiendo que nun contaben con formación específica pa ello".

La Fiscalía considera que los fechos son constitutivos d'un delitu contra la vida y salú de los trabayadores de los artículos 316 y 318 del Códigu Penal y d'un delitu d'homicidiu imprudente del artículu 142.1. Amás de los trés años de prisión, la Fiscalía solicita la inhabilitación especial pal exerciciu del cargu de presidente y representante llegal mientres esi mesmu espaciu de tiempu, asina como l'abonu de les costes procesales y el pagu d'una indemnización de 208.000 euros a la familia del fináu.