Foru y PP súmense a la proposición de la esquierda xixonesa en defensa de la música n'asturianu

XIXÓN, 1 Ago. (EUROPA PRESS) -

Tolos grupos municipales del Conceyu de Xixón, menos Vox, votaron esti martes nel Plenu Municipal a favor de la proposición presentada por PSOE, IX-MP-IAS y Podemos Xixón, en defensa y promoción de la música y cultura n'asturianu na ciudá, especialmente nos eventos festivos, educativos y culturales.

Con esta propuesta, búscase garantizar l'usu del asturianu y respetar la normativa de la promoción d'esta llingua, amás de que naide pueda ser discrimináu por espresase n'asturianu o por dar a conocer les sos idees.

Magar el votu en contra a la iniciativa plenaria de Vox, sociu de Gobiernu, el portavoz de Foru, Jesús Martínez Salvador, refugó que vaiga haber vetos y comprometió más promoción del asturianu.

"Esti Gobiernu nun va vetar a nengún artista, y muncho menos a nengún artista asturianu", afirmó. Eso sí, destacó que'l puntu de partida de la programación festiva "nun ye'l meyor", al argumentar que lo diseñó'l Gobiernu anterior de PSOE-IU.

Sobre esto últimu, criticó que'l ciclu de conciertos del Botánicu, onde había gran protagonismu d'artistes asturianos, nun va tar esti branu, como tampoco nun hai'l festival del Arcu Atlánticu que creara Foru nin el so sustitutu creáu pol Gobiernu anterior, 'Al Resve'.

Martínez Salvador dexó claro que protexer l'asturianu ye una obligación y dixo que "nun va haber nengún tipu de vetu, "va haber más promoción". Asina, aseguró que la presencia d'artistes asturianos va ser mayor que nos últimos cuatro años.

Tamién el PP, sociu de Gobiernu, apoyó esta proposición. La so portavoz, Ángela Pumariega, defendió la promoción del asturianu, pero ensin imposiciones.

Al empar, calificó de "poco coherente" que los trés partíos d'esquierda presenten esta iniciativa na que reclamen más programación n'asturianu, cuando la qu'hai ye la diseñada pol Executivu anterior de PSOE y IX.

Per otru llau, la portavoz de Vox, Sara Álvarez Rouco, consideró que l'usu del asturianu ta "normalizáu dafechu", ensin conflictu. "Naide prohibe nada", afirmó. asina, aseguró que "naide ye discriminao por opinar", pa depués criticar a Podemos que paez que tol mundu puede opinar, "menos Vox".

A la esquierda acusóla d'intentar monopolizar la cultura. Per otru llau, señaló que los espectáculos de temática asturiana van siguir, pero ensin prevalencia énte los d'otru tipu.

Tamién esixó a la bancada d'enfrente que se dea cuenta de que Xixón ye plural y qu'hai que programar de too, "ensin sectarismu ideolóxicu", dixo. Con too, abogó por ufiertar a los xixoneses oportunidaes culturales variaes.

DESAUTORIZAR A VOX

Nel casu del PSOE, el conceyal José Ramón Tuero llamó l'atención sobre lo que-y paez una contradicción dientro del Gobiernu local, ente les palabres de la conceyala de Festexos, la portavoz de Vox, y los otros dos grupos políticos que conformen l'Executivu local, Foru y PP.

Asina, consideró que si daquién plantea una cuestión "tan bárbara como lo qu'escuchamos", con alusión a les declaraciones de Rouco sobre los artistes n'asturianu, dixo que l'alcaldesa, Carmen Moriyón, tenía que desautorizala.

Con too, dixo qu'existe la esmolición de que nun se vaiga a contratar a xente que defenda la oficialidá del asturianu y mostró'l so deséu de qu'haya un Plan Municipal de Normalización Llingüística nuevu. "Música n'asturianu, sí, y siempre", reivindicó'l conceyal socialista.

La portavoz de Podemos, Olaya Suárez defendió la obligación del Conceyu de garantizar los derechos llingüísticos y encamentó a nun usar les instituciones contra los que defenden la oficialidá del asturianu. Reivindicó, amás, una sociedá abierta y arguyosa de la so pluriculturalidá.

Nesi sentíu, punxo d'exemplu al artista asturianu Rodrigo Cuevas, que ye un referente internacional. Pa ella, sería "la cosa más fondamente paleta" que quieran vetar a artistes como él.

Enantes del debate políticu, Mapi Quintana, en nome del colectivu de 'Música n'asturianu, SÍ', animó a estremar les motivaciones partidistes de la cultura y pidió defender les propuestes artístiques en cualquier llingua.

Quintana remarcó que sería una paradoxa que los contraten fuera d'Asturies o España, pero en Xixón non por cantar n'asturianu. Defendió, nesti casu, nun poner "etiquetes escluyentes" a nengún artista. Tamién reivindicó que ye una decisión propia de caún si ta a favor de la oficialidá del asturianu.

Tamién citó dellos grupos y artistes que lleven la cultura asturiana y el so idioma a otres partes del país o'l mundu, como Dixebra o Rodrigo Cuevas.

Nesti sentíu, reclamó apostar pola cultura propia, por ser "única nel mundu", siendo'l pueblu asturianu l'únicu capaz de creala y vendela, según Quintana, qu'apelló al consensu n'apoyu a una industria cultural que cada añu da trabayu a 11.000 persones.