UVIÉU, 23 Oct. (EUROPA PRESS) -
La Biblioteca d'Asturies Ramón Pérez de Ayala espón una esbilla de pieces de patrimoniu bibliográficu adquiríes pola Conseyería de Cultura, Política Llingüística y Turismu en 2019. La muestra entámase pola celebración, esti sábadu, del Día de les Biblioteques. La esposición va permanecer abierta hasta'l 2 de payares.
La Biblioteca d'Asturies adquirió l'añu pasáu un númberu importante de documentos pa la so colección bibliográfica asturiana, que supera yá los 360.000 exemplares.
Ente los llamaos materiales especiales (mapes, grabaciones sonores, gráficos, etc.) hai exemplares como les dos cartes náutiques de Lucas Janszoon Waghenaer (1533-1606), fueyes sueltes del atles Spieghel der Zeevaerdt, de 1584-1585, que completen, xunto con otra fueya que yá tenía la Biblioteca d'Asturies, la totalidá de la mariña asturiana, o un discu de 78 rpm con dos cantares interpretaos pol gaiteru de Lliberdón, nuna grabación publicada en 1916.
Tamién van poder vese materiales como un cartelu de 1908 de les fiestes de Ribeseya impresu en Valencia, el tercer álbum de cromos de les Aventures de Pinín por Alfonso o una muestra d'una estensa colección d'etiquetes de botelles de sidra del sieglu XX.
Nel casu de los manuscritos, destaca un 'Palique' de Leopoldo Alas Clarín, que se suma a la que ta considerada la meyor colección de manuscritos clarinianos existente n'España. La esposición inclúi tamién cartes d'Alejandro Pidal y Mon y de Ramón de Campoamor.
