'Golpe de efecto': naide rabia como Clint Eastwood

MADRID, 23 de Payares (EUROPA PRESS - Israel Arias)

Clint Eastwood vuelve ponese ante les cámares pa da-y fundamentu y interés a 'Golpe de efecto', la ópera prima del so sociu y amigu Robert Lorenz. Un drama familiar col béisbol como telón de fondu que cuenta tamién con Amy Adams y Justin Timberlake como protagonistes.

Too por amistá. Dende 1993, cuando se punxo a les ordes de Wolfgang Petersen pa rodar 'En la línea de fuego', Eastwood nun actuaba pa otru director que nun fuera él mesmu. Nel 2008 afirmó que 'Gran Torino' sería'l so últimu trabayu como actor. Pero la llamada de Robert Lorenz, la so mano derecha nos rodaxes y el so sociu y compañeru na productora 'Malpaso' dende hai casi dos décades, pudo más que les sos promeses.

Porque'l vieyu Clint tien llicencia pa facer del 'ónde dixe digo, digo Diego' una muestra de llealtá y, de camín, un regalu al respetable. Él ye Gus Lobel, un vieyu cazatalentos que mientres décades descubrió a delles de les grandes estrelles del béisbol. Solitariu, encerriscáu y rabión como namás podría selo'l mesmu Eastwood na vida real, Gus niégase a aceptar que ta quedando ciegu y poro inservible. Ye un güeyador incapaz de güeyar.

Pete Klein, el so amigu y xefe de los güeyadores de los Atlanta Braves al que da vida John Goodman, encárga-y una última misión: siguir a un mozu batiador d'institutu que pue ser númberu ún del draft. Consciente de los problemes de visión qu'apuren al so vieyu amigu, Pete decide alertar a la so fía Mickey (Amy Adams).

A pesar de que padre y fía nun se lleven especialmente bien, Mickey decide aparcar per unos díes les sos absorbentes obligaciones nel despachu d'abogaos nel que trabaya a estaya p'acompañar al so padre nel que pue ser el so últimu viaxe.

Y mientres la disfuncional familia Lobel ve partíos de béisbol y tírase los trastos a la cabeza, pellí apaez Johnny, xuguete rotu que descubrió nel so día'l mesmu Gus, metíu agora a güeyador. Un tipu simpáticu qu'intenta llabrase una carrera nesti deporte fuera del campu y que, cómo yera d'esperar, nun va tardar en fixase nos encantos de Mickey.

Con estos elementos yá tenemos sirvíu esti drama sobre les relaciones parternofiliales d'aspiraciones costumbristes que tien nel amor al béisbol y al eternu carisma del so protagonista los sos pegoyos fundamentales. De lo primero servidor reconozse un fatu absolutu. Agora bien, de lo segundo... un adictu incorrexible.

Y ye que volver disfrutar na gran pantalla d'un mitu andante del Séptimu Arte como ye Clint Eastwood ye un lluxu que compensa toles faltes de les que carez 'Golpe de efecto'.

DE TÓPICU EN TÓPICU DE LA MANO DE CLINT

Pue que la mayor d'elles seya la fixación del guión que firma Randy Brown de debalar de tópicu en tópicu sin la más mínima vergoña nin propósitu d'enmienda. Asina, y a midida qu'avancen les sos casi dos hores de metraxe, el prometedor debú de Lorenz acaba tornando nuna total 'americanada' con un desenllaz demasiao atentu y forzáu que da al públicu más complaciente tolo que pue esperar d'un final 'Made in Hollywood'.

Eso sí, la 'americanada' en cuestión ta filmada de forma más qu'aceptable. Lo convencional y cotidiano ye'l refuxu ideal pa que disfrutemos en tol so rellume del esgastáu Gus, un güelu rabión que pide pizza p'almorzar y paez tener más apegu al so puru y la so vieya gorra qu'a la so propia fía.

Los llugares comunes pelos que transita la cinta de Lorenz son un escenariu aparente pal llucimientu d'un personaxe concebíu una vez más -como yá fixo'l mesmu Eastwood en delles de les sos últimes películes: 'Million Dollar Baby' y, sobremanera, 'Gran Torino'- por y pa esti vieyu Clint.

L'incombustible carisma del protagonista ta acompañau de forma bien correcta pola siempre eficaz, y n'ocasiones brillosa, Amy Adams y por un Justin Timberlake que cada vez tien más hechura ante la cámara. Los dos tán mui bien, igual que los secundarios John Goodman, Matthew Lillard y Robert Patrick, pero cuando Gus nun ta en planu... falta algo.

Una sensación de vacíu apodérase de la previsible narración, mientres el deséu de que'l vieyu Clint apaeza rabiando per cualquier esquina de la pantalla y agasaye al mocín Timberlake con una bona pescozada por cortexar a la so fía va 'in crescendo'. Ye inevitable.

Resumiendo, 'Golpe de efecto' nun ye una película de Clint Eastwood, pero sí ye una película con Clint Eastwood. Y eso, según ta'l patiu, yá ye muncho.