Graciano García, Patronu d'Honor de Caveda y Nava pol so llabor na Fundación Príncipe y n'Asturias Semanal

EP

UVIÉU, 12 de Payares (EUROPA PRESS)

La Fundación Caveda y Nava nomará esti añu Patronu d'Honor al periodista Graciano García, conocíu por ser fundador de la revista Asturias Semanal y director de la Fundación Príncipe d'Asturies dende la so fundación hasta'l 2009. L'actu va celebrase'l próximu sábadu, día 20 de Payares.

Nuna nota prensa, la entidad recordó que "Graciano García, periodista de profesión, fundó nos años setenta la revista Asturias Semanal", onde empezó aparecer la sección 'Conceyu Bable' "que tanta importancia tuvo a la hora de da-y un nuevu puxu a la normalización del asturianu".

"Tiempu depués, yá como responsable de la Fundación Príncipe, Graciano García punxo'l nuestru país nel mapa internacional y acertó a la hora de prestixar institucionalmente elementos tan simbólicos de la nuestra identidá como l'himnu", añade. Asina, la nota esplica que "col so nomamientu como Patronu d'Honor pretendemos reconocer estos méritos y contar cola so complicidá pa qu'esi camín de prestixu insititucional incluya tamién al nuestru idioma".

La xornada como siempre va celebrase en en Villaviciosa. A les doce y media fairáse ante la casa natal de Caveda l'avezáu homenaxe floral. Dempués, na sede de la Fundación Cardín daráse acoyida al nuevu Patronu d'Honor.

García ye'l décimo tercer patronu d'Honor quenoma la Fundación. Antes fueron María Teresa Restegui Caveda (Descendiente de D. Xosé Caveda y Nava), Gabriel del Campo Restegui (Descendiente de D. Xosé Caveda y Nava), María Antonio del Campo Restegui (Descendiente de D. Xosé Caveda y Nava), Carmen del Campo Restegui (Descendiente de D. Xosé Caveda y Nava), Gabino Díaz Merchán (Arzobispu d'Uviéu), Emilio Marcos Vallaure (Director del Muséu de Belles Artes d'Asturies), Carmen Ruiz Tilve (Cronista oficial d'Uviéu), Paloma Uría Ríu (Diputada na Xunta Xeneral), Merecedes Fernández Pardo (Presidente del partíu popular de Xixón), Hugo Morán (Presidente de la Federación Asturiana de Conceyos), Enrique Castro Quini (Futbolista internacional) y Vicente Gotor Santamarina (Rector de la Universidá d'Uviéu).

INACIU IGLESIAS DEXA LA PRESIDENCIA

Pela so parte, el presidente de la Fundación Caveda y Nava, Inaciu Iglesias anunció güei qu'ésti será'l so últimu añu nel cargu.

"Llevo cuatro temporaes y tengo que recalcar que foi pa mi un honor poder continuar el llabor de Jose Luis Atienza y Telvino González al frente d'esta institución", señala. Iglesias considerá que realizó'l trabayu "lo meyor que fue quién". En pasando esta VIII Xornada, entamará'l procesu electoral.