Gutiérrez (FSA) confía en que l'electoráu valore la rápida reacción de Javier Fernández al espulsar a Villa

UVIÉU, 20 d'Ochobre (EUROPA PRESS)

El secretariu d'Organización de la Federación Socialista Asturiana, Jesús Gutiérrez, mostró esti llunes la so confianza en que la ciudadanía valore nes próximes elecciones autonómiques del 2015 la rápida reacción del secretariu xeneral de la formación y presidente d'Asturies, Javier Fernández, al espulsar del partíu al sindicalista José Ángel Fernández Villa, investigáu por una supuesta fortuna oculta de 1,4 millones d'euros.

Nuna rueda prensa anterior a la xunta colos secretarios xenerales de les agrupaciones llocales pa preparar la estratexa electoral, preguntáron-y sobre la posible influencia negativa del casu Villa sobre les perspectives electorales del PSOE.

El secretariu d'Organización mostró la so esperanza de que los ciudadanos valoren "la inmediata reacción" de Javier Fernández, que "minutos primero que'l sindicatu (SOMA), anunció una midida dolorosa y necesaria (la espulsión del partíu del exsindicalista)". "Nun hai una organización n'Asturies que tenga tan claro lo qu'hai que facer cuando ún de los sos miembros mete la pata o la mano", calcó'l representante socialista.

Aprovechó l'asuntu p'atacar al Partíu Popular, recordando l'aprobación por unanimidá, el pasáu vienres nel plenu de la Xunta Xeneral, de la propuesta del PSOE pa que los partíos espulsen de les sos files a los cargos políticos contra los que s'abre xuiciu oral. Nesa xornada, la diputada del PP, Enma Ramos, refugó que tal acuerdu afectara al conceyal del PP n'Uviéu Jaime Reinares, condenáu por revelación de secretos. La razón que manexó ye que tovía cabe recursu. "O nun s'enteró, o nun quieren enterase o tán riéndose del parlamentu", remachó Gutiérrez, pa mostrar el so deséu de que los ciudadanos sepan estremar el comportamientu d'ún y d'otru partíu.

ESPULSIÓN DEFINITIVA DE VILLA

El casu Villa ocupó la mayor parte de la ronda de preguntes de la rueda de prensa. L'exsindicalista alcuéntrase espulsáu provisionalmente y tovlía en periodu d'alegaciones, sin que se presentara nenguna. Darréu, va procedese a la espulsión definitiva, que según los cálculos de Gutiérrez, va producise esta selmana.

Preguntáu si nun-y paecía estraño qu'una persona de la que se dicía que ponía y quitaba presidentes agora alcuéntrese tan sola, respondió: "nun sé si ponía y quitaba presidentes. Dacuando constrúyense mitos". En tou casu, "nun m'estraña qu'una persona que fizo eso alcuéntrese na más absoluta soledá".