Iniciativa critica la "falta de compromisu" de RTVE na creación de conteníos n'asturianu

   UVIÉU, 20 Mar. (EUROPA PRESS) -

   Iniciativa pol Asturianu criticó esti vienres la "falta de compromisu" llingüísticu de Radiotelevisión Española (RTVE) cola promoción y normalización del asturianu, tres analizar les respuestes oficiales remitíes pol ente públicu a unes recién preguntes parlamentaries del diputáu de Sumar por Asturies, Rafael Cofiño.

   Según esplica la organización nuna nota de prensa, a entamos de febreru, el representante asturianu comprometióse nun conceyu con Iniciativa pol Asturianu a treslladar al Congresu delles demandes de la organización sobre la presencia de les llingües propies d'Asturies nel ente públicu estatal.

   Na opinión de la entidá, les respuestes del presidente de RTVE, José Pablo López, "nun concreten nengún compromisu nin apuesten por avances claros" na creación de conteníos n'asturianu. La so presidenta, Arantza Margolles, calificó la contestación de "xenérica" y criticó l'ausencia de "midíes concretes nin calendariu definíu".

   Margolles señaló amás que "idiomes con protección xurídica y estatutaria pero esin estatus d'oficialida entá, como l'asturianu o l'aragonés, queden fuera de los avances llingüísticos que se tán produciendo en RTVE".

   El colectivu considera "inaceptable" que RTVE siga eludiendo la so responsabilidá como serviciu públicu estatal y quedando en declaraciones probes que nun se traducen n'avances reales pa la llingua asturiana y l'eonaviegu.