Iniciativa pol Asturianu destaca'l crecimientu del sofitu a la oficialidá na Xunta Xeneral

   OVIEDO, 13 Jun. (EUROPA PRESS) -

   Iniciativa pol Asturianu considera que'l resultáu de la votación de esti xueves na Xunta Xeneral del Principáu d'Asturies, na que se llogró una mayoría parllamentaria a favor de la oficialidá de les llingües propies, espeya la realidá social que sofita mayoritariamente esta declaración pal asturianu y pal eonaviego.

   Según detallen n'una nota de prensa, anque consideren que ye cierto que nun se llogren los tres quintos de votos requeríos nel Estatutu pa la so aprobación, el sofitu de los partíos del Gobiernu (FSA-PSOE y Convocatoria por Asturies) y el grupu mestu alcancen 22 votos, siendo una victoria y una mayoría parllamentaria inédita na democracia.

   "El númberos de diputaos y diputaes que consideren necesario la oficialidá va medrando en cada llexislatura y esti resultáu xenera ilusión y fuercia pa llograr nuevos partíos nesti alcuentru consistucional pol futuru de les llingües", apunten.

   Recuerden que nel añu 1991, únicamente había un diputáu que defendía abiertamente la oficialidá; güei, 34 años dempués, son 22 de 43 representantes los que secunden la oficialidá como ferramienta pa dar futuru n'igualdá a los idiomes propios d'Asturies.

   A les puertes de la Xunta Xeneral, Iván Llera, presidente de la organización, apuntó que "esti resultáu nun ye frutu del azar o de la casualidá; ye'l resultáu d'un trabayu de búsqueda de consensos, d'alcuentros y de convencer a favor del idioma y tamién de desideoloxizar y d'entender la defensa del patrimoniu llingüísticu como un trabayu conxuntu de tola sociedá".

   La organización considera que'l trabayu pol asturianu nun acaba equí; al contrariu, acaba d'entamar un camín pa consiguir llograr el sofitu claru del Partíu Popular a la oficialidá de les llingües propies como ocurre en la Comunidá Valenciana, Galicia o Baleares.