La inxeniera Lorena Prado Orcoyen asume la Subdirección Xeneral de Cambiu Climáticu y Economía Circular del Principáu

UVIÉU, 14 Jun. (EUROPA PRESS) -

A María Lorena Prado Orcoyen (Pamplona, 1975) designáronla subdirectora xeneral de Cambiu Climáticu y Economía Circular del Gobiernu d'Asturies. Funcionaria del Cuerpu d'Inxenieros de Mines del Estáu dende l'añu 2008, a partir de 2017 trabayó como conseyera técnica de la Oficina Española de Cambiu Climáticu, adscrita al Ministeriu pa la Transición Ecolóxica y el Retu Demográficu.

El nomamientu apaez esti vienres nel Boletín Oficial del Principáu d'Asturies (Bopa) y el so departamentu va depender orgánicamente de la conseyera de Transición Ecolóxica, Industria y Desarrollu Económicu, Nieves Roqueñí.

Prado Orcoyen ye inxeniera cimera de Mines pola Universidá d'Uviéu y cuenta con un máster n'Inxeniería y Xestión Medioambiental de la Escuela d'Organización Industrial (EOI). Ocupó distintes responsabilidaes na Alministración Xeneral del Estáu, ente les que figuren ser vocal asesora y conseyera técnica nel gabinete de la Secretaría d'Estáu d'Enerxía ente los años 2010 y 2014, y subdireutora xeneral de Rellaciones Enerxétiques Internacionales (2014-2015).

Tamién participó en distintos grupos de trabayu nacionales, europeos y internacionales en materia d'enerxía, tresporte y cambiu climáticu, ente los que destaca la so participación nes negociaciones de los grupos de trabayu del Conseyu Européu y nes actividaes de l'Axencia Europea de Medioambiente.