UVIÉU, 14 Abr. (EUROPA PRESS) -
L'escritor Ismael González Arias acaba de publicar con Ediciones Trabe la novela 'La reserva protexida de Les Cuenques'. Trátase del rellatu de cómo Eleonnor Windstone ve l'Asturies, en concreto'l Mieres de Camín, del primer añu del sieglu nuevu.
La novela trescribe puntu per puntu'l díariu que la reportera foi escribiendo nel tiempu que pasó nesta tierra. Peles sos páxines cuerren Villa y Campelo, Rodríguez Vigil, Álvarez Areces o l'Asaltacunes, al llau de Gabino de Lorenzo.
"Nel 2001 nos locales de la Low Library de la Columbia University de Nueva York, la National Geographic Magazine da los sos premios anuales. Ente los trabayos qu'opten a esti galardón ta'l tituláu 'La casta de los prexubilaos de Les Cuenques mineres asturianes', obra de la reportera norteamericana Eleonnor Windstone. Pa cubrir la noticia, el diariu asturianu 'La Nueva España' manda pa la ciudá de los rascacielos al periodista Mariano Requejo", indicó la editorial.
Ismael María González Arias (Uviéu, 1958) ye xestor cultural y productor musical y ganó dos veces el Premiu de Novela Xosefa Xovellanos con 'El cuartu negociu' (1992) y 'En busca de Xovellanos' (2005). Tamién cola novela xuvenil 'Les puertes del paraísu' foi a facese col Premiu de Lliteratura Infantil-Xuvenil María Josefa Canellada 2009.
