- WIKIPEDIA.
UVIÉU, 21 Jul. (EUROPA PRESS) -
El presidente de l'Academia de la Llingua Asturiana, Xosé Antón González Riaño, afirmó que'l nomamientu de la escritora Berta Piñán como conseyera de Cultura, Política Llingüística y Turismu ye "una gran noticia".
Riaño afirmólo asina nun apunte en twitter minutos depués de que'l presidente del Principáu anunciara que la escritora de Cangues d'Onís Berta Piñán va formar parte del so equipu como Conseyera de Cultura y Política Llingüística.
"Abúltanos una gran noticia, Adrián Barbón", indicó'l presidente de l'Academia, pal que Piñán ye "una persona intelixente, culta, con gran sensibilidá social y una de les meyores escritores n'asturianu".
Nel mesmu sentíu, en nome de la institución que preside, Riaño ufrió a la conseyera nueva "tola collaboración nel so facer". Ún de los primeros actos públicos de Piñán va ser participar na inauguración de la Universidá Asturiana de Branu, que se va inaugurar el 29 de xunetu en Cangas del Narcea.
Berta Piñán (Cañu, Cangues d'Onís, 1963) ye una de les voces de más prestixu de les lletres asturianes. A pesar que la so obra abarca dende l'ensayu sociollingüísticu hasta la lliteratura infantil y xuvenil, Piñán considérase poeta penriba de too y tien ganáu los más prestixosos premios d'Asturies, el Teodoro Cuesta con 'Vida privada' (1991), o'l Xosefa Xovellanos con 'Como la muda al sol d'una llagartesa' (2018).
Les sos escases incursiones na narrativa cuenten tamién col reconocimientu del públicu y la crítica, casu de 'La tierra entero'(1996) o 'La maleta al agua' (2005). Nel xéneru infantil y xuvenil tien ganaos los premios María Xosefa Canellada con 'Agua, arroz y maíz' (2008) y el de la Crítica d'Asturies en dos ediciones consecutives con 'Les coses que-y presten a Fran' (2008) y 'L'estranxeru' (2009).
Per otru llau, 'Como la muda al sol d'una llagartesa' ye la so primera novela, una de les poques escrites n'asturianu por una muyer y la segunda que se fixo col Xosefa Xovellanos d'autoría femenina.
