L'acampada de La Escandalera sigue énte la cercanía de los Premios y llama a crear comités pa la fuelga del 11N

   UVIÉU, 15 Oct. (EUROPA PRESS) -

   El Sindicatu d'Inquilines y Inquilinos d'Asturies y el Sindicatu de Vivienda d'Asturies van siguir cola so acampada na Plaza de La Escandalera y nun tarrecen el so desallugu énte la cercanía de la entrega de los Premios Princesa d'Asturies el próximu 23 d'ochobre, día pal que tán planiándose yá movilizaciones. Amás los promotores de l'acampada animen a tola ciudadanía de tolos conceyos asturianos a crear los Comités Populares pa la Fuelga Xeneral del 11 de payares.

   Indicólo asina a los medios de comunicación el voceru del sindicatu d'Inquilines, Andrés García que dixo que l'acampada ye soberana pa decidir hasta cuando permanecen y nun tarrecen ser desallugaos por causa de los Premios.

   "Nós tamos equí, nun tarrecemos a nada nin a naide. Vamos siguir movilizaos y organizaos y tollo de cara a la fuelga xeneral", dixo García. Asina, pal día de la Ceremonia de los Premios Princesa indicó que van xunise a la movilización de tolos años contra la monarquía.

   "Vamos facelo pa reivindicar que lo importante ye la clase trabayadora, les clases populares. Ye un eventu onde se concentren les élites polítiques y económiques, nengún tien problemes de vivienda y tán totalmente separaos de la sociedá", dixo.

COMITÉS FUELGA XENERAL

   Andrés García informó sobre la creación del Comité Popular pa la Fuelga Xeneral, confirmáu por más de 50 colectivos sindicales, sociales, culturales y políticos de la sociedá civil asturiana. Amás, animó a la creación de Comités Populares Locales el próximu vienres a les 19.00 hores nes localidaes d'Uviéu, Xixón, Avilés, Mieres, Llangréu, Siero y l'Oriente asturianu y tamién de Comites Locales y barriales que, según dixo, van crease nos próximos díes.

   "Queremos que se faigan munchos más comités locales d'equí p'arriba y animamos a tola sociedá civil asturiana a allegar esti vienres a les siete de la tarde, a les places que tán na información de cada comité de fuelga local", dixo.

   La función d'esos comités pasa per "ximelgar y entamar per centros de trabayu, estudiu, places, mercaos, comercios, barrios, y tou rincón abiertu de les localidaes d'Asturies" la convocatoria de fuelga.