L'asturianu va llegar al segundu ciclu d'Infantil y a la Escuela Oficial d'Idiomes el próximu cursu

   UVIÉU, 8 Jul. (EUROPA PRESS) -

   La conseyera d'Educación, Eva Ledo, anunció que'l Gobiernu d'Asturies ta peracabando'l desenvolvimientu normativu pa empezar a ufiertar el próximu cursu l'asturianu nel segundu ciclu d'Infantil y na Escuela Oficial d'Idiomes. "Va dexanos ampliar la ufierta y responder a lo que dicta'l Plan d'Usu y Normalización del Asturianu", comentó.

   Fízolo nos actos de la XXIX Fiesta de la Oficialidá de la Llingua, en Bimenes, el primer conceyu que declaró oficial l'asturianu fai 29 años, nun xestu simbólicu y reivindicativu. "Tamos, poro, nel meyor escenariu pa esplicar les principales midíes y meyores de la Conseyería na defensa y promoción del asturianu y el eonaviego nes nueses aules", dixo.

   Según detalló'l Principáu n'una nota de prensa, la conseyera repitió qu'esi primer aproximamientu al asturianu o'l eonaviego n'Infantil "va tener calter voluntariu" y va llevase a cabu, de forma simultánea, nos trés cursos del segundu ciclu, na área denominada Comunicación y Representación de la Realidá. Esta iniciativa pionera va suponer una inversión de 5 millones -contemplada nel presupuestu d'anguaño- y la contratación d'un centenar de docentes.

   La conseyería unvió un formulariu a los centros pa conocer l'interés qu'espierta esta nueva ufierta educativa. Colos datos arrexuntaos d'alredor de 200 colexos, la inscripción supera los 6.000 estudiantes, que representen más del 60% del total. "Entá ye llueu pa saber la respuesta esacta de les families pero, en principiu, la valoración que facemos ye positiva", apuntó.

LA ESPECIALIDÁ DOCENTE

   Per otru llau, Ledo mentó'l pactu Asturies Educa, robláu esta selmana con cuatro organizaciones sindicales, onde figura'l compromisu de volver treslladar al ministeriu que se reconoza la especialidá docente de Llingua Asturiana, una histórica demanda del profesoráu.

   Les novedaes del próximu cursu enmárquense n'una política de gobiernu desenvuelta nos últimos años. Otres iniciatives fueron la recuperación el cursu pasáu de la Axenda Didáutica, en collaboración cola Conseyería de Cultura, Política Llingüística y Turismu, con un programa d'actividaes pa la promoción social del asturianu y el eonaviego.

   Anguaño incorporáronse per primer vegada dos distinciones a la conocencia del asturianu y el eonaviego nos premios estraordinarios al rendimientu académicu.

   La conseyera apurrió un últimu datu "que demuestra l'interés escontra la conocencia d'asturianu". La inscripción pa realizar en septiembre les pruebes llibres de certificación d'asturianu nos trés niveles ufiertaos (A2, B2 y C1) doblóse a la convocatoria anterior, pasando de 121 a 246 persones inscrites. "Esto paez demostrar que caminamos na dirección fayadiza", concluyó.