Llan de Cubel, Assia y la OSPA, cabeces de cartel del Día d'Asturies n'Os Ozcos

UVIÉU, 5 Sep. (EUROPA PRESS) -

Los trés conceyos d'Os Ozcos (Vilanova, Santolaya y San Martín d'Ozcos) van albergar dende esti vienres hasta'l 8 de setiembre los actos qu'entama'l Principáu pa celebrar el Día d'Asturies. El programa d'actividaes de baldre, tituláu 'Reflexu de la nuestra identidá', va incluyir los conciertos de Llan de Cubel, Assia y la OSPA.

Ye la primer vez que'l Día d'Asturies va celebrase en trés conceyos, nesti casu los mesmos qu'en 2016 se xuntaron pa llograr el premiu al Pueblu Exemplar d'Asturies. El movimientu asociativu va tener un papel relevante y dellos colectivos del occidente van encargase d'entamar actividaes na zona.

En Vilanova d'Ozcos, el 6 de setiembre a les 17.00 hores va abrir el mercáu tradicional y depués van desenvolvese la muestra cultural Nova Novena, nel Monesteriu de Santa María, cola instalación llumínica de Rubén González; l'espectáculu 'A Lluz. Orión y a nova lluz'; el conciertu d'Ún de Grao; el vídeu instalación Sal férrea, d'Eloy Couceiro; el slam de poesía y cuentacuentos col Espaciu Cultural Santa Eufemia, y les actuaciones de la Orquesta Sinfónica del Principáu d'Asturies, de Nacasa Trío y de Ferla Megía. Esa mesma tarde, tamién se van ufiertar visites guiaes al Ecomuséu del Pan y a la Ferrería Mayor, en Santa Eufemia.

En Santalla d'Ozcos los actos van ser el 7 de setiembre. Va haber mercáu tradicional y demostraciones de forxa, cestería, manexu del telar artesanu, batéu d'oru y arte floral. Tamién muestres de deporte adaptau, al cargu de la Federación de Deportes pa les Persones con Discapacidá Física del Principáu (Fedema), y xuegos tradicionales. Pela mañana, van ufiertase vuelos cautivos en globu aerostáticu y teatru sobre ruedes al cargu de La Petite Caravane, d'Adrián Conde. Mentanto tola xornada van realizase visites guiaes al mazu d'El Mazonovo y a la Casa Natal del Marqués de Sargadelos, en Ferreirela de Baxo. La música, yá pela tarde, van ponela Sintético Fantástico, la Banda de Gaitas Marino Tapiega, Llan de Cubel y un dj.

En San Martín d'Ozcos, el 8 de setiembre va ser, amás del mercáu tradicional, una demostración de teitao d'horros y una muestra de ganáu autóctono y de mastín asturianu de la mano de l'Asociación Española de Mastín Asturianu. El públicu va poder esfrutar de teatru de cai con Dormiyosos, de Factoría Norte, en collaboración con 'El Encuentro Teatro', y de les actuaciones del cuartetu Celthair de la Orquesta Sinfónica del Principáu d'Asturies, de Fesoria a les Ortigues y del Grupu Assia.

Les visites guiaes al Palaciu de Mon y al Centru d'Interpretación Casa del Marco Muséu de la Casa Campesina, en Vilarquille, tamién se van realizar n'horariu de mañana y tarde.

Los recorríos guiaos a los distintos museos y equipamientos y los vuelos cautivos de globu aerostáticu tienen places llimitaes polo que hai qu'acutar enantes de les 14.00 hores del 6 de setiembre nos teléfonos 985 185 860/902 306 600 o al traviés del corréu lletrónicu promocioncultura@turismoycultura.asturias.es