Llangréu súmase a la Selmana de Les Lletres con una programación cultural alredor del teatru n'asturianu

   UVIÉU, 29 Abr. (EUROPA PRESS) -

   L'Ayuntamientu de Llangréu súmase la conmemoración de la XLVII edición de la Selmana de les Lletres Asturianes con una programación cultural que tien como oxetivu "poner en valor, festexar y visibilizar la llingua asturiana". Esti añu rindese homenaxe a Taresa Cónsul y al teatru popular.

   Les actividaes van celebrase nel Cine Felgueroso de Sama y entamen el llunes 4 de mayu, a les 19.00 hores, cola presentación del Proyectu Cónsul de microteatru. Nel marcu d'esta xornada van representase les obres 'Comunicando', de Laura Camafeita, pola compañía Selena de Sotu'l Barcu, y "Alcuerdu amistosu', de Pepín García, pola compañía San Félix de Valdesoto (Siero).

   La programación va continuar el sábadu 9 de mayu, a les 18.00 hores, cola representación de 'Tía Miseria', a cargu de Covenant Producciones. Esta obra, ganadora del Premiu Nel Amaro de Teatru Profesional n'asturianu en 2025, toma como base la tradición oral pa construyir una propuesta escénica que combina música, cantares, danza, humor y elementos propios de la cultura popular. El monologuista Carlos Alba Cellero encárgase de la so adaptación, revisitando un relatu d'oríxenes milenarios dende una perspectiva contemporánea.

   Como pieslle del ciclu, el día 14 de mayu, Daniel García Granda va presentar la obra 'En llucha incierta', traducción al asturianu de In Dubious Battle, del escritor estauxunidense y Premiu Nobel de Lliteratura John Steinbeck. Esta traducción, reconocida col cuartu Premiu 'Florina Alías', recupera una novela publicada en 1936 que aborda la fuelga de trabayadores del campu en California mientres la Gran Depresión, tratando cuestiones como la llucha de clases, el lideralgu y el sacrificiu personal nos conflictos llaborales.

   L'Ayuntamientu de Llangréu convida a la ciudadanía a participar n'esti conxuntu d'actividaes, que van ser d'accesu llibre y gratuitu hasta completar l'aforu.