L'organigrama del Principáu incorpora pela primer vez subdirecciones xenerales

UVIÉU, 18 Ago. (EUROPA PRESS) -

El Gobiernu d'Asturies remató esti vienres el diseñu de la estructura alministrativa nueva, qu'incorpora pela primer vez subdirecciones xenerales "que respuenden a cometíos bien concretos, como la reforma de l'Alministración o l'atracción d'inversiones".

Por eso, Vicepresidencia va tener una Subdireición Xeneral de Reforma de l'Alministración y una de Reorganización y Modernización del Empléu Públicu; mentes qu'en Facienda va haber una Subdirección Xeneral de Presupuestos y Sector Públicu y otra de Finances y Xuegu. Amás, Salú va cuntar con una Subdirección de Salú Pública.

Per otru llau, en Ciencia va haber una Subdirección Xeneral pa la Estratexa del Modelu de Rexón y Atracción d'Inversiones y Transición Ecolóxica, Industria y Desenvolvimientu Económicu va cuntar con una Subdirección Xeneral de Cambiu Climáticu y Economía Circular. P'acabar, Fomentu va tener una Subdirección xeneral de Prevención de Quemes.

Asina lo indicaron dende l'Executivu, n'anunciando que la estructura ta pensada "pa responder con axilidá a les necesidaes de la sociedá, amenorgar torgues burocrátiques pa la ciudadanía y les empreses y fixar la innovación nel sector públicu, ente otros oxetivos prioritarios".

L'Executivu caltién el mesmu númberu de conseyeríes que'l mandatu anterior y siete viceconseyeríes frente a los cuatro anteriores, anque con una organización distinta, "adaptada a desafíos nuevos, como por casu la culminación de la transición ecolóxica, l'apueste pola ciencia y la innovación o'l refuerciu de les polítiques d'atención al mediu rural".

"La renovación del estáu de bienestar, la crecedera económica, la creación d'empléu de calidá y l'impulsu demográficu son dalgunos de los grandes fines pa esta llexislatura", indicaron dende l'Executivu al traviés de nota de prensa depués del Conseyu de Gobiernu, que tuvo presidíu pola vicepresidenta Gimena Llamedo.

L'arquitectura institucional incorpora pela primer vez les subdirecciones xenerales, prevista na Llei del Principáu d'Asturies 2/2023, de 15 de marzu, d'Empléu Públicu. Esta figura yá existe n'otres alministraciones autonómiques y tamién na estatal.

Estes places, que van poder cubrise con funcionarios o personal de llibre designación, según lo establecío en cada decretu d'estructura, respuenden a cometíos bien concretos, como la reforma de l'Alministración, ún de los compromisos pa esta llexislatura, o l'atracción d'inversiones pa xenerar actividá económica, polo que precisen de personal directivo profesional.

Dambes subdirecciones respuenden a la necesidá de siguir amenorgando torgues burocrátiques -tanto pa l'actividá empresarial como pa la tramitación d'ayudes sociales- y favorecer la fixación d'Asturies como destín inversor, demandes repetíes del empresariáu y de les organizaciones sociales.

L'Executivu dio lluz verde la selmana pasada a los decretos d'estructura de la Presidencia, onde queda encuadrada la Viceconseyería de Cultura, Política Llingüística y Deporte, y de la Conseyería d'Educación. Dambos decretos publicáronse el miércoles nel Boletín Oficial del Principáu (Bopa).

Na xunta celebrada esta mañana, el Conseyu de Gobiernu aprobó los de tolos demás departamentos, un pasu necesariu pa siguir colos nomamientos nos distintos pasos de l'Alministración autonómica.