Los trabayos de xeorreferenciación remataron en 49 conceyos, de los que 10 yá tienen mapa
UVIÉU, 19 Nov. (EUROPA PRESS) -
El Serviciu de Cartografía del Principáu, dependiente de la Conseyería de Mediu Rural y Cohesión Territorial, ta ellaborando los mapes de la toponimia oficial d'Asturies.
Esti proyectu ye posible gracies a la documentación previa de la Conseyería de Cultura, Política Llingüística y Turismu y la Xunta Asesora de Toponimia, teniendo en cuenta los criterios de l'Academia de la Llingua Asturiana, y a la collaboración de los mesmos conceyos.
La Dirección Xeneral d'Ordenación del Territoriu y Urbanismu, área de la que depende Cartografía, va estender esti trabayu a tol territoriu de la comunidá. Hasta la fecha, el llabor de xeorreferenciación acabó en 49 conceyos, de los que 10 yá disponen de mapa; ta en marcha en 12 y va empezar l'añu qu'entra n'otros 5. Quedaríen 12 conceyos que nun tienen aprobáu'l so decretu de normalización.
Los diez conceyos que yá cunten tienen mapes son Siero, Bimenes, Amieva, Quirós, L.lena, Samartín d'Ozcos, Santalla d'Ozcos, Vilanova d'Ozcos, Santiso d'Abres y Muros.
Los profesionales en materia de cartografía del Principáu realizaron, en collaboración con cada consistoriu, un trabayu de xeorreferenciación de los topónimos oficiales incluyíos nos decretos d'oficialización pa treslladalos a la cartografía nueva de caún de los conceyos.
Los mapes recueyen con nivel grande de detalle los asentamientos de población: parroquies, capitales de conceyu, aldees, barrios, quintanes y caseries. Depués van tar disponibles nel xeoportal del Principáu SITPA-IDEAS , dende onde van poder descargase llibremente.
