UVIÉU, 21 Abr. (EUROPA PRESS) -
La cantante Diamantina Rodríguez, una de les voces más destacaes de la historia de la música asturiana y referente de la xeneración nueva d'interpretes, morrió esti miércoles a los 100 años d'edá.
Diamantina Rodríguez nació en Vil.laxime (Quirós) en 1920 y convirtióse nuna de les muyeres pioneres dientro de la canción asturiana hasta consolidase como una de les meyores voces de la tonada de tolos tiempos.
En 1948 principió a participar en concursos de tonada y en 1969 grabó'l so primer discu. Amás, foi mayestra de voces güei yá referenciales pa la tonada como la d'Anabel Santiago. Recibió la Medaya d'Asturies nel 2002 pola so contribución a la recuperación del patrimoniu musical asturianu.
El portal Musicasturiana.com destacó de la obra de l'artista que Diamantina Rodríguez compuso himnos como 'Arboleda Bien Plantada' y recuperó la tonada al piano como fixeron los clásicos de l'asturianada de primeros del sieglu XX.
Otra manera, recordó como Diamantina desafió a la censura franquista dedicándo-y en 1971 un discu al Cancioneru del músicólogu exiliáu Eduardo Martínez Torner "y cantando delantre de la mesma Carmen Polo 'L'Alma de los Mineros', a lo que'l xefe local de Falange en Mieres respondió-y que los mineros nun tienen alma".
La Xunta pola Defensa de la Llingua, nun apunte en twitter recoyíu por Europa Press, destacó qu'Asturies pierde "una de les voces más reconocíes de la música asturiana". "Les tos actuaciones resuenen na nuestra alcordanza", señalaron.
