El PP asturianu quier que l'Estututu espeye "espresamente" el compromisu de solidaridá y financiación intercomunitaria

UVIÉU, 03 d'Abril (EUROPA PRESS)

El Partíu Popular va pidir que'l nuevu Estatutu d'Autonomía d'Asturies recueya "espresamente" el pidimientu de solidaridá que faiga alusión al Fondu de Compensación Interterritorial y tamién que quede recoyíu'l compromisu de la financiación intercomunitaria. Asina, el PP consideró qu'espeyar concretamente estos compromisos ye importante p'Asturies y destacó amás que "nun debería haber problemes p'acordalo asina col PSOE".

Asina lo manifestaron en rueda prensa'l presidente del PP, Ovidio Sánchez, asina como'l voceru parlamentariu, Joaquín Aréstegui, y la diputada Alejandra Cuétara.

El presidente del PP asturianu, Ovidio Sánchez, aseguró que lo que quier el PP ye manifestar que nun se mueve de los principios que siempre defendieron respecto al modelu de financiación y qu'amás quier tresmtir al Gobiernu que la posición d'Asturies tien de ser reforzada dafechu por tolos grupos, dalgo polo que'l PP ta dispuestu a trabayar.

El cabezaleru de los 'populares' asturianos afirmó que'l so grupu "nun ta dispuestu a aceptar que se frayen los principios constitucionales" polo que va reforzar l'apoyu del carácter interrexonal del Fondu de compensación dientro de la reforma estatutaria, porque de non algamalo Asturies diba sufrir "consecuencies graves".

Nesti sen Alejandra Cuétara destacó que "les balances fiscales nun son un bon llibru de cabecera" ya añadió que l'alderique sobre la financiación autonómica "nun pue tornar nuna tormenta d'idees porque les variables apropiaes a tener en cuenta son les que ya existen".

"L'alderique ta en si l'estáu ta o nun ta preparáu pa defender la solidaridá", dixo Alejandra Cuétara, que denunció amás que'l Fondu de Compensación Interterritorial ta nesti momentu "conxeláu".

Ovidio Sánchez recordó que'l PP ya alvirtió de les negatives consecuenies del Estatutu d'Autonomía de Cataluña pa otres comunidaes, sobre tou les que necesiten de más solidaridá, como Asturies.

"Pasamos de la España de la interterritorialidá a un intentu de billateralidá financiera", dixo Sánchez, que celebró "que'l PSOE asturianu se dea cuenta agora d'esi peligru y la gravedá de la situación", y abandone la idea d'incorporar nel estatutu asturianu un tipu d'inversiones asemeyaes a les de Cataluña, porque dase cuenta de que "cualquier modelu de financiación distintu al que tenemos pue perxudicar al Principáu gravemente".

CAPITALIDÁ D'UVIÉU.

El PP tamién defenderá que'l nuevu estatutu reconoza la capitalidá d'Uviéu. Según indicó'l presidente de los 'poulares' asturianos, Ovidio Sánchez, munches rexones tienen desarrollada una Llei de Capitalidá, que contempla una serie de gastos, inversiones y asitiamientu d'instituciones.

Ovidio Sánchez ofreció güei una rueda prensa pa tratar la finaciación autonómica nel próximu Estautu d'Autonomía d'Asturies.

A entrugues de los periodistes, el presidente del PP mostróse "d'alcuerdu" col alcalde d'Uviéu, Gabino de Lorenzo, qu'exixó'l nuevu testu del Estatutu d'Autonomía, tres la reforma que se ta tramitando, reafirme la capitalidá d'Uviéu nel Principáu d'Asturies.