El primer ministru del Ulster diz qu'España tien de probar "evidencies" de delitu nel casu De Juana Chaos

Reuters

BELFAST, 19 de Payares (EUROPA PRESS/Eva Martínez Millán)

El primer ministru d'Irlanda del Norte, Peter Robinson, considera qu'anque España ye un "sociu cercanu" de la provincia del Ulster, deberá demostrar les "evidencies" del delitu que l'Audiencia Nacional atribúi al ex presu d'ETA Iñaki de Juana Chaos.

En declaraciones a Europa Press, Robinson almitió qu'esti trámite ye imprescindible pa que les autoridaes xudiciales norirlandeses responsables de decidir sobre la estradición accedan positivamente a la demanda de la Xusticia española, qu'emitió una orde europea de detención (OED) pa llograr l'unvíu de De Juana a España.

Asina, pese a reivindicar la "independencia" del tribunal de Laganside, encargáu de desarrollar el procesu qu'entamó'l pasáu llunes cola entrega voluntaria del ex xefe del 'Comandu Madrid', el cabezaleru del Partíu Unionista Democráticu (DUP), nes sos sigles n'inglés) sorrayó que compete a la Xusticia española "decidir si hai evidencies" de delitu na carta que se lleyó en nome del ex presu nel homenaxe que se-y dedicó en San Sebastián el 2 d'agostu, coincidiendo cola so salida de prisión.

Nesti sen, el ministru principal precisó que "si les hai", la provincia del Ulster ye un "sociu cercanu" d'España que va facilitar el cumplimientu de los procedimientos establecíos, siempre que dende Madrid se "tomen les decisiones d'una manera llegal".

Sicasí, dempués de que'l xuez norirlandés Tom Burgess resolviere la llibertá condicional pa De Juana a la espera de resolver les dudes surdíes sobre la 'euro-orde' y la propia naturaleza del delitu, Robinson recordó que les propies autoridaes españoles "reconocieron lo complicao del procesu".

Con too, sorrayó que cualquier decisión rellacionada col futuru d'Iñaki de Juana Chaos "depende de los tribunales" y aprovechó pa calcar en qu'en Reinu Uníu se considera yá "una tradición" que la clase política "nun interfiera" nos procesos xudiciales.