El Principáu celebra la XLVII Selmana de Les Lletres con un programa que pón el focu nel teatru asturianu

PRINCIPADO

   UVIÉU, 28 Abr. (EUROPA PRESS) -

   El Gobiernu del Principáu impulsa una nueva edición de la Selmana de Les Lletres Asturianes con una programación descentralizada que va llegar a 14 conceyos y que combina'l rescate d'una figura esencial na lliteratura asturiana, la de Taresa Cónsul, col teatru popular, la creación contemporanea, la memoria cultural y la participación ciudadana.

   La XLVII Selmana de Les Lletres Asturianes qu'entama la Conseyería de Cultura, Política Llingüística y Deporte, esplega un programa diversu que consolida la presencia del asturianu y del eonaviego na vida pública y cultural.

   La celebración va empezar pasao mañana, día 30 d'abril, col Conciertu de Les Lletres Asturianes, de la Orquesta Sinfónica del Principáu (OSPA) y va desenvolvese hasta'l 10 de mayu, con más d'una ventena d'actividaes destinaes a averar la llingua asturiana a nuevos públicos y reforzar el so usu en distintos ámbitos.

   La edición d'anguaño, dedicada a Taresa Cónsul y al teatru costumbrista asturianu, ta coordinada por Dolfo Camilo Díaz y Laura Iglesia. La propuesta combina actuaciones escéniques, musicales y divulgatives con un homenaxe siguíu al teatru popular, una tradición centenaria que llega viva y anovada a los nuestros díes.

   El Día de Les Lletres Asturianes, que va celebrase el vienres 8 de mayu, constitúi una de les xornaes centrales. Esi día, llibreríes y establecimientos de toa Asturies van aplicar un 10% de descuentu na compra de llibros o discos n'asturianu y eonaviego. Tamién van distribuyir la obra colectiva 'De viva voz.

   Taresa Cónsul y el teatru asturianu', hasta escosar esistencies. Trátase d'un volume que desvela aspectos inéditos d'esta autora que vivió ente los sieglos XVIII y XIX, la primer muyer de nome conocíu qu'escribió teatru n'asturianu.

   Coles mesmes, en llibreríes de la zona del Eo-Navia va distribuyise tamién la obra Cásasenos a nena, un risonderu entremés de Manuel García Galano, col que se rinde homenaxe a un autor esencial d'esta llingua.

   La conseyería asitia esta cita como pieza central de la so acción cultural y normalizadora, empobinada a fortalecer l'asturianu y l'eonaviegu, sofitar al sector creativu, dar a conocer el teatru asturianu y averar la cultura al conxuntu del territoriu en condiciones d'igualdá.