El Principáu impulsa'l patrimoniu industrial mineru como productu turísticu

UVIÉU, 10 Feb. (EUROPA PRESS) -

El Gobiernu d'Asturies impulsa un plan qu'apuesta pol patrimoniu industrial mineru como reclamu turísticu prioritariu, al que se va destinar más d'un millón de los fondos europeos Next Generation.

La conseyera de Cultura, Política Llingüística y Turismu, Berta Piñán, presidió esti xueves la xunta del grupu de trabayu sobre patrimoniu industrial mineru, qu'aconceyó nel Muséu de la Minería y l'Industria, y na que tamién participaron la viceconseyera de Turismu, Graciela Blanco, y el directores de Cultura y Patrimoniu, y Minería y Enerxía, Pablo Llión y Belarmina Díaz.

Colos representantes del Principáu, formen parte d'esti órganu la Federación Asturiana de Conceyos (FACC), Hunosa, el sindicatu SOMA-FITAG-UXT, la Universidá d'Uviéu, el Centru de Desarrollu y Cooperación Territorial (Cecodet) y el Colexu d'Arquitectos.

"La creación d'una marca turística propia va ser la primer actuación. El plan recueye, amás, el diseñu d'una serie de rutes temátiques en dellos puntos de la comunidá con un filu conductor que van ser espacios vinculaos a la historia minera", señaló Berta Piñán. La conseyera destacó la oportunidá que supón apostar "pola enorme riqueza cultural que representa esti patrimoniu".

El proyectu preve la creación d'un repositoriu audiovisual con pieces promocionales, la ellaboración de materiales informativos nuevos y la puesta en marcha de campañes publicitaries centraes nel turismu industrial. Tamién se valoren acciones con prescriptores especializaos como operadores, prensa especializada o miembros de colectivos y instituciones vinculaes a la xestión y promoción del patrimoniu industrial.

Tamién se va impulsar la presencia d'Asturies en foros especializaos cola organización d'un foru bianual qu'axunte a espertos na materia. Amás, va fomentase la conexón con instituciones y organizaciones nacionales y internacionales que trabayen na puesta en valor del patrimoniu industrial. El potencial qu'esti tipu d'espacios pue tener como escenariu de rodaxes ye otra de les opciones.