La promoción del asturianu mantiénse nel 0,04% del total del presupuestu

UVIÉU, 1 Dic. (EUROPA PRESS) -

La partida pa promoción del asturianu recoyida nel proyectu de presupuestos pa 2023 xube a 2.535.701 euros, lo que supón --al igual que nes cuentes del 2019, 2020 y 2021-- el 0,04% del total.

Nos presupuestos vixentes la promoción del asturianu tenía una partida de 2.205.441 euros, polo que la política llingüística pal 2023 xube en 330.260 euros. Sicasí, al producise una medría xeneral del presupuestu autonómicu, la partida continúa representando'l 0,04% del total de les cuentes.

Ente les midíes a desenvolver ta normalizar la presencia online del asturianu ente les llingües del mundu al traviés de la implantación en traductores y ferramientes dixitales, amás de velar pola reconocencia nacional y internacional de la lliteratura escrita en llingua asturiana, amás de la cultura que s'espresa nesti idioma.

Otra manera, vuelve haber una partida destinada a RTPA de 100.000 euros pa producir programes n'asturianu --que se sumen a los 27 millones d'euros que recibe RTPA de la Conseyería de Presidencia--.

Precisamente, nos oxetivos de RTPA ta "siguir incorporando a la programación, como yá se vieno faciendo nos últimos años, espacios que contribuyan a la normalización de la llingua asturiana, entendida esa normalización como l'usu del asturianu en condiciones de normalidá". "Nel 2023, esi usu del asturianu va algamar, amás d'a los programes non informativos, a los espacios informativos de TPA y RPA", indícase nos presupuestos.

Per otru llau, la Sociedá Pública de Xestión y Promoción Turística y Cultural va recibir 150.000 euros y la Universidá d'Uviéu 19.960 euros, 5.560 euros más qu'anguaño.

Tamién va haber subvenciones a los servicios de normalización que se mantienen --la Comarca de la Sidra, Cabu Peñes, Avilés, Mieres, Llangréu, L.lena, Cangas, Corvera, Castrillón, Llanera, Grau-Candamu, A Veiga y el Parque Históricu del Navia--.

Amás, hai partíes pa los de Cabrales y la Mancomunidá Valle del Nalón, mentes que desaparecen el de Samartín del Rei Aurelio y Ribeseya --en 2022 yá desaparecieron los de Siero y Llaviana--. Otra manera, la Federación Asturiana de Conceyos va recibir 131.500 euros, 45.000 más qu'anguaño.

Per otru llau, l'Academia de la Llingua Asturiana va tener --si salen alantre los presupuestos-- 240.000 euros, igual que nes cuentes d'esti añu. Tamién hai partíes p'actividaes culturales --como 15.000 euros pa la presencia asturiana nel Festival de Lorient o 24.000 pa la Fundación Valdés Salas--, promoción del asturianu nos medios --110.000 euros, igual qu'en 2022--, la normalización del idioma nes empreses --70.000 euros-- y la promoción del llibru --109.000 euros--. Amás, igual que nel 2022 hai una partida de 10.000 euros pa que les biblioteques públiques merquen llibros n'asturianu o gallego-asturianu.

Tamién s'inclúi la convocatoria de los cinco premios lliterarios, el Premiu Nel Amaro de teatru profesional y el Premiu Camaretá al Meyor Cantar, amás de elaboración y xestión de les convocatories de les pruebes de certificación correspondiente a los niveles de competencias en llingua asturiana.

Ente otres actividaes, esti añu va desarrollase la Selmana de les Lletres Asturianes, el Día de les Ciencies Asturianes, convenios con festivales internacionales y asociaciones culturales, el Día de la Llingua Materna o'l concursu 'Entaina a escribir', entre otros.

CULTURA TRADICIONAL

Per otru llau, dexando de llau la política llingüística, la Dirección Xeneral de Cultura y Patrimoniu tien una partida de 255.000 pa un plan pa la cultura castreña, 500.000 pal Arte Asturianu o Prerrománicu, 350.000 euros pa la restauración d'horros y paneres, 40.000 pa los horros d'Amieva y 25.000 pa los elementos etnográficos de les brañes.

P'acabar, la Dirección Xeneral de Deportes contempla 30.000 euros pal deporte tradicional dientro d'un presupuestu global de más de 4.276.000 de euros.