Pumares (Foru) afea'l "sucursalismu" de la mayoría de diputaos frente a los "héroes y patriotes" de 1808

UVIÉU, 30 May. (EUROPA PRESS) -

El secretariu xeneral y portavoz parllamentariu de Foru Asturies na Xunta Xeneral del Principáu d'Asturies, Adrián Pumares, afeó esti sábadu'l "sucursalismu" de la mayoría de diputaos frente a los "héroes y patriotes" de 1808.

Asina lo dixo en declaraciones a los medios delantre de la Catedral d'Uviéu enantes de participar, xunto al vicesecretariu de Comunicación de la formación, José Suárez Arias-Cachero y de un grupu de directivos y afiliaos del partíu, na ufrienda floral na Sala Capitular polos actos de conmemoración del 25 de mayu de 1808.

Pumares reclamó que "esta fecha tenga un sitiu especial nel calendariu del Principáu d'Asturies, que se recuerde de verdá esta efeméride".

Amás, llamentó que "güei, la mayoría de diputaos que tán na Xunta Xeneral tán rindíos al sucursalismu". "L'últimu exemplu claru foi la votación del llobu nel Congresu de los Diputaos, onde nesti casu'l PSOE, n'otres ocasiones ye'l PP, vota en contra de los intereses d'Asturies", dixo.

Por eso, encamentó a que "nuna fecha tan importante como ye'l 25 de mayu hai que remontase contra'l sucursalismu, hai que reclamar qu'el 25 de mayu sía un día importante nel calendariu del Principáu y hai que reclamar a Adrián Barbón, a tol Gobiernu de Barbón, pero mui especialmente al Presidente, que depués de trés años de Llexislatura encare d'una vez los grandes retos que tien el Principáu porque nun lo ta faciendo".

"Ta mui bien que quiera recuperar esta efeméride, con eso va cuntar con tol nuestru apoyu pero nun taría mal que copiara un poquitín d'aquellos héroes y patriotes de 1808 y tuviera tanto PSOE como PP la idea del Principáu d'Asturies pa evitar votaciones bochornoses como la que vimos esta selmana nel Congresu de los Diputaos, tamién a los Ciudadanos que s'astuvieron y a la esquierda votando en contra de los intereses del Principáu d'Asturies", concluyó.