"Usábemos la frase 'LQDC', lo que diga Cascos, pa too", afirma Inaciu Iglesias

UVIÉU 16 Ene. (EUROPA PRESS) -

La Sección Tercera de l'Audiencia acoyó esti xueves la tercer xornada del xuiciu contra'l fundador de Foru Asturies y ex presidente del Principáu, Francisco Álvarez-Cascos, por supuesta apropiación indebida y nesta sesión testificó'l que fuera integrante de la comisión Directiva de Foru nel periodu de 2012 a 2016, Inaciu Iglesias, qu'indicó qu'usaben "la frase 'LQDC', lo que diga Cascos, pa too".

La Fiscalía pide pal ex políticu una pena de trés años y mediu de prisión por un delitu d'apropiación indebida, depués de que'l partíu Foru Asturies lu denunciara por pasar gastos que consideró de calter personal ayenos a la so actividá política. La Fiscalía cifra en 181.648 euros el dineru que l'acusáu podría apoderase de forma indebida

Como yá fixeron otros testigos, Iglesias esplicó que yera Francisco Álvarez-Cascos el que mandaba nel partíu y la comisión directiva yera una especie de "caxa de resonancia" porque la última palabra en too, tamién "en materia económico", pasaba per Cascos.

Inaciu Iglesias indicó que los datos económicos y previsiones que se treslladaben a la Xunta Directiva "se cantaben" ensin entrar en detalles y indicó que "nun conoció" los gastos personales que Cascos pasó al partíu y qu'agora son oxetu de xuiciu.

"A la señora Cabal yo la calificaría de contable, yo'l tratu que tenía con ella yera nestos términos. Nun quiero frivolizar, pero na ellaboración del periódicu --'El Hormiguero', una publicación del partíu--, bono, pues había grupos de trabayu, lo normal, y teníemos acuñada una frase cuando decidíemos cualquier cosa, pues queremos facelo asina, asá, y esa frase yera 'LQDC', lo que diga Cascos. Nesi sentíu, la decisión última, mesmo nos temes de, pues eso, comunicativos, mediáticos o d'otru tipu, teníala él. Y insisto, nos temes económicos, pues claramente yera de Cascos".

Iglesias dixo que tampoco nun tuvo conocimientu "en nengún casu de la sede de Castellana" de Foru en Madrid y indicó que Cacos yera "mui celosu cola so localización" y naide tenía "una certidume d'ónde taba en tou momentu". Asina, indicó que Cascos "usaba teléfonos de penúltima xeneración pa que fuera más difícil alcontralu".