Villa (SOMA) alvierte que'l futuru de les cuenques y d'Asturies nun pue recayer namás nos fondos mineros

UVIÉU, 19 de Febreru (EUROPA PRESS)

El secretariu xeneral del SOMA-FIA-UXT, José Ángel Fernández Villa, alvirtió güei en Mieres que los fondos mineros puen xugar un papel fundamental na salida de la crisis, "pero'l futuru de les cuenques mineres y d'Asturies nun pue recayer namás nos recursos procedentes del Plan de la Minería".

El líder sindical dexó claro, nesti sen, que "ye prioritaria la complementariedá, dao que les partíes del carbón nun son abondo por sí mesmes". Fernández Villa fizo estes declaraciones mientres l'actu d'inauguración d'una esposición na Casa del Pueblu de Mieres. Una muestra que supón l'abertura de la conmemoración del centenariu del sindicatu, que va entamar por esti motivu otres actividaes a lo llargo d'esti añu.

El secretariu xeneral del SOMA aprovechó la so visita a Mieres pa mostrar les sos dudes sopbre "qué va asoceder cuando acaben les partíes mineras y, nesti sen, preguntóse d'ónde s'espera que lleguen más recursos y cómo y cuándo se van a reivindicar".

El máximu responsable del SOMA recordó que los recursos económicos taben vinculaos al axuste nel sector y mostró'l so convencimientu, y el del so sindicatu, de que "los procesos d'axuste tocaron fondu, polo que pidió poner sobro la mesa'l debate de qué va asoceder cuando remate l'actual Plan del Carbón".

Fernández Villa tamién plantegó la necesidá d'entainar la ellaboración del nuevu reglamentu européu d'ayudes al carbón y mostró la so confianza en que, mientres la presidencia española de la Unión Europea, "queden puestes les bases d'esti documentu que, de primeres, podría aprobase nel segundu semestre, mientres la presidencia belga". El secretariu xeneral del SOMA-FIA-UXT apuntó que ye prioritario pa sacar alantre esti reglamentu buscar aliaos n'otros países de tradición carbonera como Polonia o la República Checa.

Fernández Villa tamién fizo un repasu a temes d'actualidá como les propuestes del Gobiernu d'ampliar la edá de xubilación o la subida de los años pa computar les pensiones. Unes midíes que refuga'l responsable sindical, que les tacha de "regresives y insolidaries", y que, na so opinión, "respuenden a que'l Gobiernu paez asumir les tesis del mercáu defendíes por polítiques neolliberales".