El xuez anula la creación de la oficina de recaudación d'Uviéu por incumplir la tasa de reposición

UVIÉU, 21 d'Avientu (EUROPA PRESS)

El Xulgáu Contencioso-Alministrativu númberu 1 d'Uviéu anuló la convocatoria efectuada pol Conceyu d'Uviéu pa la incorporación de 13 funcionarios interinos na categoría d'auxiliares alministrativos pa la estaya de recaudación nel Consistoriu uvieín.

El xuez destaca que la creación de places dexando de llau toles llendes fixes nes normes sobre reposición d'efectivos implicaría un fraude de llei a lo asina establecío na norma, faciendo usu de dicha posibilidá (nomamientu de funcionariu interín al amparu de la regla del númberu dos del citáu artículu) pa una finalidá distinta de lo ellí establecío, que nun ye la de "creación" de nueves places sinón namás la de nomamientu de funcionariu interín pa plaza y puestu de primeres creáu.

La sentencia torna'l recursu no referío al cambiu de la Relación de puestos de trabayu municipal al considerar que ye l'actu d'aprobación de la plantiya'l que determina'l númberu d'efectivos del Conceyu -nesti casu d'auxiliares alministrativos- y el que decide, a última hora, la subida del númberu de tales places d'auxiliares alministrativos en plantiya incumpliendo les llendes fixes na Llei xeneral de presupuestos.

La resolución acueye en parte l'argumentación espuesta pela parte actora y considera que s'incumplen les llendes establecíes na normativa básica del Estáu (Llei Xeneral de Presupuestos del Estáu 48/2015 de 29 d'ochobre) tocantes a les restricciones que fixa dicha norma pa la incorporación de nuevu personal a les Alministraciones públiques.

Na mesma sentencia, el maxistráu, Juan Carlos García López, torna'l recursu no referío al cambiu de la Relación de Puestos de Trabayu Municipal al considerar que ye l'actu d'aprobación de la plantiya'l que determina'l númberu d'efectivos del Conceyu -nesti casu d'auxiliares alministrativos- y el que decide, a última hora, la subida del númberu de tales places d'auxiliares alministrativos en plantiya, incumpliendo les llendes fixaes na Llei Xeneral de Presupuestos.

No referente a l'anulación de la convocatoria, la sentencia señala que poles socesives Lleis Xenerales de Presupuestos del Estáu viniéronse incluyendo importantes restricciones en relación a la incorporación de nuevu personal a les Alministraciones públiques, moviéndose dende una limitación prácticamente absoluta a una suavización de diches limitaciones, al dir ampliándose la tasa de reposición d'efectivos en determinaos ámbitos.

Nesti casu, les 13 places d'auxiliar alministrativu nun se ven apoyaes nes limitaciones asina fixaes no que cinca a la tasa de reposición d'efectivos, esto ye, a lo asina fixao nel artículu 20 unu Llei 48/2015 de Presupuestos xenerales del Estáu sinón que s'efectuaba esi cambiu de plantiya aumentado asina'l númberu d'efectivos al amparu de lo establecío nel númberu dos de dichu preceptu relativu al nomamientu de "funcionarios interinos" que permite efectuar tal nomamientu pa supuestos escepcionales y pa cubrir necesidaes urxentes y inaplazables.

El xuez entiende que nesti casu "nun se ta ante supuestu de nomamientos de funcionarios pa un determináu refuerzu -escesu o acumulación de llabores- o por un programa de calter temporal, supuestos dambos de nomamientos penriba de la plantiya de la que tea dotada l'Alministración, sinón d'una auténtica creación de places en dicha plantiya, y que, precisamente al alcontrase vacantes, "cúbranse asina por personal interín".

El maxistráu apunta que s'utilizó la vía escepcional del númberu dos del artículu 20 LPXE pa una finalidá distinta de l'asina establecida nel citáu preceptu, y dexando vacíu de conteníu en realidá les limitaciones conteníes nel númberu unu de dichu artículu, y considera que ye claro que'l sen y finalidá de la norma ye fixar una determinada limitación a la incorporación de nuevu personal y pa ellos dispón una regla xeneral consistente en que, pa la incorporación de nuevu personal, tien qu'atenese a la tasa de reposición d'efectivos que contién na norma y que dispón unes llendes del 100%.

El fallu señala esta sentencia "en nada atrabanca a que'l Conceyu pueda, dientro de la RPT, diseñar la organigrama municipal colos servicios qu'entienda oportunos y crear na estaya de recaudación o en cualquier otra área, los puestos de trabayu qu'entienda oportunos p'atender les funciones encamentaes, pero tales puestos tendrán de ser provistos con una plantiya dientro de les llendes que-y marca la Llei xeneral de presupuestos del Estáu, y poro sin aumentar la so plantiya incumplendo tal norma, yá seya de forma directa o per víes indirectes".