La Xunta conmemora'l Día Mundial de la Poesía con llectures de poemes y reivindicaciones de paz

UVIÉU, 21 Mar. (EUROPA PRESS) -

La Xunta Xeneral del Principáu celebró esti llunes un actu institucional pa conmemorar el Día Mundial de la Poesía con llectures de poemes y reivindicaciones de paz énte la invasión rusa d'Ucraína.

Ún de los momentos más emotivos foi'l protagonizáu pol profesor de violín del Conservatoriu de Música d'Uviéu y director del grupu de cámara 'Ensemble Ars Mundi', Yuri Nasushkin, que lleó un poema n'ucraín y realizó un discursu destacando la fraternidá ente'l pueblu ucraín y l'asturianu.

Tamién marcada pol simbolismu tuvo la intervención del impulsor de la iniciativa 'Asturias, capital de la Poesía' y director eméritu vitaliciu de la Fundación Princesa d'Asturies, Graciano García, que destacó'l respaldu al proyectu del Rei Felipe VI lo mesmo que de la sociedá asturiana y los sos dirixentes, pa que la poesía favoreza la unión nun tiempu "tan devastador, fráxil y inciertu".

Al mundu fálten-y versos y fraternidá, y sóbren-y terrorismu y dolor, dixo Graciano García, resaltando qu'Asturies ye un gran pueblu que sabe da-y el so tiempu a la poesía.

La poesía emponderóla, igualmente, el presidente de la Xunta Xeneral, Marcelino Marcos Líndez, y el presidente del Principáu, Adrián Barbón, coincidiendo dambos na so importancia pa interpretar y compartir el mundu.

'Pa otros', de la escritora y conseyera de Cultura, Berta Piñán, foi'l poema n'asturianu escoyíu por Adrián Barbón. Amás, el Premiu Nacional de Lliteratura Asturiana, Xuan Xosé Sánchez Vicente; y dellos alumnos del Colexu Río Seya de Les Arriondes participaron de la sesión de llectura de poemes na escalinata del parllamentu autonómicu.

Tamién intervinieron, ente otros, la delegada del Gobiernu n'Asturies, Delia Losa; l'alcalde d'Uviéu, Alfredo Canteli; el rector de la Universidá d'Uviéu, Ignacio Villaverde; el síndicu mayor de la Sindicatura de Cuentes, Roberto Fernández Llera; y la presidenta del Conseyu Consultivu, Begoña Sesma.