Adinekoen egoitzetan sendagaien erabilera segurua eta egokia indartzeko gida farmakoterapeutikoa eguneratu dute EAEn

BILBO 24 (EUROPA PRESS)

Eusko Jaurlaritzako Osasun Sailak 'Euskadiko Adinekoen Egoitzetarako Gida Farmakoterapeutikoa' eguneratu du. Osasun profesionalei sendagaiak behar bezala hautatzen eta erabiltzen laguntzera eta egoitzetan arreta farmakoterapeutiko seguruagoa eta eraginkorragoa lortzen laguntzera zuzenduta dagoen tresna bat da gida, eta 2024an gidaren lehen edizioa argitaratu zenetik agertu diren nobedade nagusiak txertatu dira eguneraketa berrian.

Nobedade horien artean dade, besteak beste, arau aldaketak, printzipio aktiboen zerrendaren berrikuspena, tratamendu algoritmoen eguneratzea eta segurtasun ohar berriak, Eusko Jaurlaritzako Osasun Sailetik jakinarazi dutenez.

Gidak instituzionalizatutako adinekoen behar espezifikoei erantzuten die, kontuan hartuta pertsona horien kasuan ohikoa izaten dela hainbat gaixotasun kroniko batera izatea eta hainbat sendagai erabiltzea. Polimedikazio egoera horrek areagotu egin dezake kontrako erreakzioen eta interakzio farmakologikoen arriskua. Gainera, zahartzeari lotutako aldaketa fisiologikoak direla eta, beharrezkoa da tratamendu jakin batzuen indikazioaren, dosiaren eta jarraipenaren balorazio espezifikoa egitea.

Testuinguru horretan, ebidentzia zientifikoan, esperientzia klinikoan eta efizientzia irizpideetan oinarritutako gomendioak biltzen ditu gidak, osasun arloko profesionalei erabakiak hartzen laguntzeko. Helburua da segurtasuna hobetzea, tratamenduen eraginkortasuna optimizatzea eta egoitzetan bizi diren pertsonentzat bizi kalitate hobea lortzen laguntzea.

Osasun arloko diziplina anitzeko profesionalen talde batek egin eta eguneratu du 'Euskadiko Adinekoen Egoitzetarako Gida Farmakoterapeutikoa'. Eusko Jaurlaritzako, Osakidetzako eta farmazia komunitarioko familia medikuntzako eta geriatriako profesionalek eta farmazialariek osatu dute taldea.

Ikuspegi bateratu horrek farmakoterapiak adinekoen kasuan dituen berezitasunak aztertzea ahalbidetu du, eta egoitzetan sendagaiak behar bezala hautatzeko eta erabiltzeko erreferentziazko tresna bihurtu du gida. Gainera, bertako gomendioak beste laguntza eremu batzuetan ere baliagarriak izan daitezke.

Gidaren ekarpen nagusien artean, honako hauek nabarmentzen dira: sendagaiak eraginkortasunaren, segurtasunaren eta ebidentzia zientifikoaren inguruko irizpideen arabera hautatzea; dosi eta forma farmazeutikoak adinekoen ezaugarri espezifikoetara egokitzea; dosifikatzeko eta sendagaiak emateko sistema pertsonalizatuetarako egokiak diren sendagaiak kontuan hartzea; sendagai berrien ebaluazioa, egiten duten ekarpen terapeutikoaren eta adinekoengan eskuragarri dagoen ebidentziaren arabera; osasun sistemaren jasangarritasunean laguntzen duten alternatiba efizienteen lehenespena.

AZKEN ALDAKETA GARRANTZITSUAK

Aurten egindako berrikuspenari esker, farmakoterapiaren eta pazientearen segurtasunaren arloetan izan diren azken aldaketa garrantzitsuak txertatu ahal izan dira, eta profesionalek beren asistentzia jardunean erabiltzen dituzten gomendioak eguneratuta eduki ahal izan dira.

Horrela, beraz, gidak erabakiak hartzen laguntzeko tresna izaten jarraitzen du, eta Euskadiko egoitzetan bizi diren adinekoengan sendagaien erabilera seguruagoa, eraginkorragoa eta arrazionalagoa sustatzen laguntzen du.

Eguneratze hori, gainera, Euskadiko Osasun Itunak pertsonak ardatz izango dituen arreta integratuago eta seguruago baterantz aurrera egiteko ezarritako helburu partekatuen barruan dago, batez ere kronikotasunak eta biztanleriaren zahartzeak dakartzaten erronkak kontuan hartuta.

Egoitzetan arreta farmakoterapeutikoa hobetzea lagungarria da tratamenduen kalitatea eta segurtasuna indartzeko, jarraitutasun asistentziala bultzatzeko eta sendagaien erabilera egokia, efizientea eta adinekoen behar espezifikoetara egokitua sustatzeko.