Aste Nagusian 2,7 milioi pertsona baino gehiagok erabili dute Metro Bilbao

BILBO 31 (EUROPA PRESS)

Metro Bilbaok marka historikoa hautsi zuen igandean. Duela 30 urtetik Aste Nagusian eskaintzen duen etengabeko zerbitzuan erregistratu ziren baliozkotze kopuruarena. Aurten, 2,7 milioi pertsonak baino gehiagok erabili zuten metroa abuztuaren 22tik 30era bitartean. Iaz baino %6 gehiago dira, eta 1996an bidaiatu zutenen laukoitza baino gehiago; izan ere, orduan jarri zen abian anbizio handiko eskaintza hori, eta, urteek aurrera egin ahala, handitu baino ez da egin haren eskakizun maila. Harrezkero, 55,7 milioi pertsonak baino gehiagok jo dute metrora Bilboko jaietara hurbiltzeko.

Metro Bilbaok adierazi duenez, "Aste Nagusiaren balantzeak bi errealitate uzten ditu agerian. Alde batetik, aurten ia irailera arte luzatu diren ospakizunen erakargarritasuna. Eta, bestetik, Metro Bilbaok gero eta garrantzi handiagoa duela Bizkaiko garraio publikoa egituratzeko ardatz gisa, baita aisialdirako joan-etorrietarako ere". "Hain zuzen ere, baliozkotze kopurua bat dator metroaren urteko datu metatuarekin: izan ere, aurten dagoeneko 70 milioi pertsona garraiatu ditu, eta, horrela jarraituta, beste errekor bat hautsiko du abenduaren 31n", gehitu du.

Xehetasun estatistikoari dagokionez, tradizioak agintzen du. Aste Nagusiko bederatzi festa egunetan, Zazpikaleak eta Abando izan ziren Bilboko geltokirik erabilienak; itsasadarraren alde banatan, berriz, Barakaldo eta Areeta izan ziren jendetsuenak. Jardunaldiak banaka hartuta, osteguna, abuztuak 27 (337.536), izan zen baliozkotze gehien.

Nabarmentzekoa da etengabeko zerbitzuko 226 orduak gorabehera tekniko nabarmenik gabe igaro direla. Gogoratu, guztira, ia hamar egun osoak izan direla. Zerbitzu jarraituaren eskaintza abuztuaren 21ean, ostirala, hasi zen, Aste Nagusiko bederatzi egunetako zirkulazioak gehituta.

ESKAINTZA AITZINDARIA

Aurtengo edizioaren balantze onari esker, Metro Bilbaok 55 milioi joan-etorri baino gehiago eskaini ditu Aste Nagusiarengatik azken 30 urteetan emaniko zerbitzu berezian. Etenik gabeko eskaintza hori zorrotza da barne kudeaketari dagokionez, eta denboraren joanarekin hazi egin da, metroaren estrategikotasunaren eta hedapenaren ildo beretik.

Apustu hura aitzindaria izan zen sortu zen garaian, eta, arian-arian, gizartearen eskaeretara egokitzen joan da. Azkenean, izan duen arrakasta ikusirik, garraio publikoko beste operadore batzuek erreplikatu egin dute urteen poderioz.

Zerbitzu berezia 1996an estreinatu zen 600.000 bidaia ingururekin, metroak Zazpikaleak eta Plentzia artean bakarrik zirkulatzen zuen garaian. Handik sei urtera, 2. linea estreinatu eta Barakaldora iritsi zenean, hirukoiztu egin zen bidaia kopurua. 2014an, trazadura osoarekin, baliozkotze kopurua 2,1 milioitik gora igo zen, eta zifra hori etenik gabe areagotu da garraio publikoak errekorrak hautsi dituen azken urteetan. Hori horrela, aurtengo edizioan jo du goia, aipatutako 2,7 milioi joan-etorrirekin.

NEGUKO ZERBITZUA

Bestaldetik, neguko zerbitzua irailaren 1ean hasiko da. Ohiko maiztasunei ekingo diegu berriz, eta lanera eta ikastera itzultzeagatik sortutako garraioaren eskaerari behar bezala erantzungo zaio.

Goizeko puntako orduan dagoen zerbitzua nabarmendu behar da. Ordutegi horretan bidaiari gehiago dago, eta maiztasuna 2,5 minutukoa izango da ardatz nagusian. Kabiezes eta Bidezabaleraino 5 minuturik behin egongo dira trenak, eta Plentziara, 20 minuturik behin.