Bilboko 2027ko aurrekontu parte hartzaileetara proposamenak aurkezteko epea apirilaren 30ean bukatuko da

BILBO 23 (EUROPA PRESS)

Bilboko 2027ko aurrekontu parte hartzaileen egitasmora proposamenak aurkezteko epea apirilaren 30ean amaituko da. Aurrekontu parte hartzaileak prozesu irekia dira, bilbotarrei aukera ematen diena Bilboko Udalaren urteko aurrekontuaren zati bat zertan erabiliko den erabakitzeko.

Bilboko Udaletik jakinarazi dutenez, interesdunek inprimaki bat bete behar dute www.bilbao.eus webgunean, ziurtagiri digitalaren edo BakQ ziurtagiriaren bidez identifikatu ondoren, eta aurrez aurre ere aurkeztu ahal izango dituzte proposamenak, herritarren arretarako bulegoetan.

Inprimaki bakoitzeko proposamen bakarra aurkeztu ahal izango da. Jasotako proposamenak udal webgunean argitaratuko dira ekainean, udal sailek proposamen horiek teknikoki aztertu ondoren. Ondoren, herritarrek bozkatzeko fasea irekiko da, irailaren 21etik urriaren 2ra, eta bilbotarrek beren auzo, barruti edo hirirako lehentasunezkotzat jotzen dituzten proiektuak hautatu ahal izango dituzte.

Bilbon erroldatutako 16 urtetik gorako pertsonek, Herritarren Partaidetzako Erakundeen Udal Erregistroan izena emana duten erakundeek, legez eratutako erakundeek (elkarteek, fundazioek, sindikatuek, profesionalen elkargoek eta zuzenbide publikoko korporazioek) eta Bilboko ikastetxeek eta hezkuntza zentroek aurekz ditzakete proposamenak.

Udal eskumenekin lotuta egongo dira, teknikoki eta ekonomikoki bideragarriak izango dira, hirirako edo hiriko barrutiren baterako interes orokorrekoak izango dira, gehienez ere 300.000 euroko aurrekontua izango dute eta 2027an gauzatzeko modukoak izango dira.